Bu gün DİN Baş Dövlət Yol Polisi İdarəsinin və Respublika Uşaq-Gənclər İnkişaf Mərkəzlərinin təşkilatçılığı ilə "Yolunuzu bizdən salın!” mövzusunda keçirdiyi respublika üzrə onlayn yarışların qaliblərinin mükafatlandırılması mərasimi keçirilib.
Xeberle.com xəbər verir ki, Sumqayıt şəhər 1 nömrəli Uşaq-Gənclər İnkişaf Mərkəzində baş tutan tədbirdə Baş Dövlət Yol Polisi İdarəsinin, Sumqayıt şəhər Təhsil Şöbəsinin və Uşaq-Gənclər İnkişaf Mərkəzlərinin nümayəndələri, o cümlədən şagirdlər iştirak ediblər.
Tədbirdə çıxış edən Baş Dövlət Yol Polisi İdarəsinin şöbə rəisi, polis polkovnik-leytenantı Namidan Piriyev bildirib ki, bu cür tədbirlərin keçirilməsi uşaq və yeniyetmələrin inkişafı üçün çox mühüm hadisədir. "Ötən il ölkə ərazisində 1587 yol-nəqliyyat hadisəsi qeydə alınıb ki, nəticədə 696 nəfər ölüb, 1410 nəfər yaralanıb. Həmçinin bu qəzalarda 35 ölüm və 133 xəsarət uşaq və yeniyetmələrlə bağlıdır və bu, yol polisi olaraq bizi çox narahat edir.
Bu cür tədbirlərin keçirilməsində əsas məqsəd müxtəlif bölgələrdə təhsil alan şagirdlər arasında yol hərəkəti qaydaları ilə bağlı maarifləndirmə işinin vacib olduğunu təbliğ etməkdir."
Digər çıxış edənlər bölgələrdə yol hərəkəti qaydaları ilə bağlı maarifləndirmə işinin əhəmiyyətindən danışıb, bu istiqamətdə dərnəklərin açılmasının vacib olduğunu qeyd ediblər.
Bildirilib ki, "Yol hərəkətinin təhlükəsizliyinə dair 2019-2023-cü illər üçün Dövlət Proqramı”nda qarşıya qoyulan vəzifələrin yerinə yetirilməsi nəticəsində yol qəzalarının sayı aşağı düşüb.
Tədbirdə Uşaq-Gənclər İnkişaf Mərkəzlərinin yol hərəkətinin təhlükəsizliyi ilə bağlı apardığı maarifləndirmə işi yüksək qiymətləndirilib.
Tədbirdə yarışlarda qalib olan komandaların üzvləri mükafatlandırılıb.
Şagirdlər maraqlı kompozisiya ilə çıxış ediblər.
Xəbərdən istifadə edərkən istinad etmək vacibdir.
