Sumqayıt şəhər Gənclər və İdman Baş İdarəsinin və şəhər Təhsil Şöbəsinin birgə təşkilatçılığı ilə ümumtəhsil müəssisələrinin IX-XI sinif şagirdləri arasında "Xəmsə” formatında keçirilən "Şuşa Kuboku” adlı bilik yarışının I, II mərhələlərinə yekun vurulmuşdur.
Yarışın keçirilməsində məqsəd, ölkə başçısının 2022-ci ilin "Şuşa ili” elan edilməsi haqqında sərəncamından irəli gələn məsələlərin həlli, 44 günlük Vətən Müharibəsinin təbliği, gənclərin intellektual səviyyəsinin, zehni inkişafının stimullaşdırması, onlar arasında sağlam elmi rəqabət mühitinin yaradılması və asudə vaxtlarının səmərəli təşkil edilməsidir.
Ümumilikdə şəhərin 32 ümumtəhsil müəssisəsi təmsil olunmaqla, 4 zona üzrə 8 qrupda keçiriləcək bilik yarışının I, II zona mərhələsində 28 saylı məktəbin "Kepler”, 3 saylı məktəbin "Oğuz”, 23 və 1 saylı məktəbin "Zəfər” komandaları yarımfinal mərhələsinə vəsiqə qazanmışlar.
Qalib komandalara Baş İdarənin fəxri fərman və hədiyyələri təqdim olunmuşdur.
Qeyd edək ki, yarışın növbəti mərhələlərinin aprel ayında keçirilməsi nəzərdə tutulur.
Xəbərdən istifadə edərkən istinad etmək vacibdir.
