Sumqayıt məktəblilərinin Peşə Təhsil Mərkəzinə ekskursiyası təşkil edildi. Sumqayıt şəhər Gənclər və İdman Baş İdarəsinin və Təhsil Şöbəsinin birgə təşkilatçılığı ilə 5 aprel 2022-ci il tarixində şəhərin ümumtəhsil müəssisələrinin IX-XI sinif şagirdlərinin İqtisadi Zonaların İnkişafı Agentliyinin nəzdində Sumqayıt Peşə Təhsil Mərkəzinə ekskursiyasına başlanılmışdır.
Məqsəd "2015-2025-ci illərdə Azərbaycan gənclərinin İnkişaf Strategiyası”nın təsdiq edilməsi haqqında Azərbaycan Respublikası Prezidentinin Sərəncamının müvafiq bəndlərindən irəli gələn vəzifələrin icrası, məktəblilərin gələcəkdə müxtəlif peşələr üzrə ilkin bilik və bacarıqlara yiyələnməsi, peşə ixtisasları barədə məlumatlandırmaqla əmək bazarına inteqrasiyası, eləcə də peşə təhsilinə marağın artırılması, müasir dövrün tələblərinə uyğun ixtisas seçimi etmələrinə yardımçı olmaqdır.
Ekskursiyada iştirakçılara mərkəzdə tədris olunan ixtisaslar, peşə istiqaməti, qəbul qaydaları haqqında ətraflı məlumat verilmiş, müxtəlif sənət növləri üzrə ilkin nəzəri və praktiki biliklərin aşılanması məqsədi ilə emalatxanalarda tədris prosesi ilə yaxından tanış edilmişlər.
Ümumilikdə 30-a yaxın məktəblinin iştirak etdiyi ekskursiyanın sonunda şagirdləri maraqlandıran suallar cavablandırılmışdır.
Ekskursiyanın aprel ayının sonuna qədər davam etdirilməsi nəzərdə tutulur.
Xəbərdən istifadə edərkən istinad etmək vacibdir.
