Sumqayıt Şəhər İcra Hakimiyyəti Başçısı yanında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın təşəbbüsü, Sumqayıt şəhər Gənclər və İdman Baş İdarəsi, Təhsil Şöbəsi, Polis İdarəsi və Narkoloji Dispanserin birgə təşkilatçılığı ilə 10 saylı tam orta məktəbdə "Sumqayıt Narkomaniyaya Yox Deyir” devizi altında növbəti maarifləndirici xarakterli görüş təşkil edilmişdir.
Məqsəd məktəbliləri sağlam həyat tərzinə təşviq etmək, narkomaniya, tütün, alkoqol və digər psixatrop maddələrin mənfi təsiri ilə bağlı bilikləndirmək və bu sahədə davranışlarını təkmilləşdirməkdir.
Görüşdə çıxış edən Sumqayıt şəhər Gənclər və İdman Baş İdarəsinin rəisi Elgün Hümbətov, Polis İdarəsinin əməkdaşı Azər Bağırov və Narkoloji Dispanserin həkimi Vüsal Cabbarov Respublikamızda narkomaniya və narkobizneslə mübarizənin ən üst səviyyədə aparıldığını qeyd etmiş, şəhərimizdə narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılmasına qarşı mübarizədən irəli gələn vəzifələrdən danışaraq, mütəmadi olaraq qabaqlayıcı əməli-profilaktik tədbirlərin həyata keçirildiyini bildirmişlər.
Sonda mövzu ətrafında gənclərlə fikir mübadiləsi aparılmış, onları maraqlandıran suallar cavablandırılmışdır.
Xəbərdən istifadə edərkən istinad etmək vacibdir.
