Sumqayıt şəhər İcra Hakimiyyəti Qarabağ əlili Malik Məcidovun mənzil müraciətləri ilə bağlı rəsmi açıqlama yayıb

Bəzi kütləvi-inormasiya vasitələrində Qarabağ əlili Malik Məcidovun müraciətlərinə baxmayaraq onun mənzillə təmin olunmaması ilə bağlı yayılan informasiyalara Sumqayıt şəhər İcra hakimiyyətinin Mənzil təsərrüfatı və mənzillərin uçotu şöbəsinin müdiri Sədaqət Əsədova aydınlıq gətirib. Şöbə müdiri Xeberle.com-a bildirib ki, vətəndaş Məcidov Malik Qardaş oğluna Qarabağ müharibəsi əlili imtiyazı əsasında işlədiyi Azərbaycan Boruyayma zavodundan 1992-ci ildə 2 otaqlı mənzil ayrılıb və Sumqayıt şəhər İcra hakimiyyəti tərəfindən onun adına sənədləşdirilib: "2003-cü ildə Malik Məcidovun müraciəti əsasında yaşadığı mənzil 47-ci məhəllədə tikilmiş yeni yaşayış binasında 2 otaqlı mənzillə dəyişdirilib. Vətəndaş 2004-cü ildə bu mənzili özəlləşdirərək Gülnarə Əliyeva adlı şəxsə satıb".

Ardınca, o söyləyib ki, 2007-ci ildə Məcidov Malik Qardaş oğlu Sumqayıt şəhər İcra hakimiyyəti tərəfindən Şəhid ailələri və qarabağ əlilləri üçün inşa edilmiş binada 2 otaqlı mənzillə təmin olunub. Sonra o, 2010-cu ildə bu mənzili də bundan öncə olduğu kimi özəlləşdirərək Qiyas Məmmədov adlı şəxsə satıb.

Şöbə müdiri onu da bildirdi ki, hazırda Malik Məcidovun həyat yoldaşı İradə Süleymanovanın mülkiyyətində Sumqayıt şəhəri 19-cu məhəllə, ev 9/20-də 18 saylı mənzil mövcuddur və bu mənzildə Məlahət Məcidova adlı bir şəxs ailəsi ilə birgə kirayə yaşayır. Malik Məcidov hazırda şəhərin Xəzər bağları massivində 640,0 kv.metr torpaq sahəsində 171 saylı evdə yaşayır: "Qeyd etmək istərdim ki, Malik Məcidova müvafiq qanunvericiliyə uyğun olaraq digər sahələrdə də Qarabağ müharibəsi əlili kimi müxtəlif güzəştlər tətbiq edilib. Həmçinin o, Azərbaycan Respublikası Əmək və Əhalinin Sosial Müdafiəsi Nazirliyi tərəfindən minik avtomobili ilə təmin olunub".

Sədaqət xanım onu da bildirdi ki, bu gün ölkəmizdə dövlət tərəfindən bütün şəhid ailələri, Qarabağ əlilləri və digər kateqoriyadan olan insanlara xüsusi diqqət və qayğı göstərilir, daima onların problemlərinin həlli istiqamətində müvafiq tədbirlər görülür.