Aprelin 7-də Sumqayıt şəhər Gənclər və İdman Baş İdarəsinin təşkilatçılığı ilə "N” saylı hərbi hissədə keçirilən "Şahin” hərbi-idman oyununun şəhər birinciliyinin final turuna yekun vurulub.
Baş İdarədən AZƏRTAC-a bildirilib ki, əvvəlcə Azərbaycanın Dövlət Himni səsləndirilib, ölkəmizin ərazi bütövlüyü uğrunda mübarizədə canlarından keçmiş şəhidlərin əziz xatirəsi bir dəqiqəlik sükutla yad edilib.
Tədbirdə çıxış edənlər Ali Baş Komandan İlham Əliyevin rəhbərliyi ilə rəşadətli Ordumuzun 44 günlük Vətən müharibəsində qazandığı şanlı Qələbədən, gənc nəslin ordu sıralarına hazırlığında və vətənpərvərlik ruhunda tərbiyə olunmasında "Şahin” hərbi-idman oyununun müstəsna əhəmiyyətindən danışıblar.
Sonra "Şahin”lər müxtəlif sınaq mərhələlərindən keçməklə bacarıqlarını nümayiş ediblər.
Yarışın yekun nəticələrinə əsasən, Təbiət Elmləri Təmayüllü Gimnaziya I, 4 saylı tam orta məktəb II, Texniki və Təbiət Elmləri Liseyi isə III yerə layiq görülüb.
Qalib komandalar Fəxri fərmanlarla təltif edilib.
Şəhər birinciliyinin qalib komandası oyunların zona mərhələsində iştirak etmək hüququ qazanıb.

Xəbərdən istifadə edərkən istinad etmək vacibdir.