Aprelin 27-də Dini Qurumlarla İş üzrə Dövlət Komitəsinin (DQİDK) təşkilatçılığı ilə Sumqayıtda "Müasir çağırışlar və qarşıda duran əsas hədəflər” mövzusunda üçgünlük regional konfrans işə başlayıb.
Dövlət Komitəsindən AZƏRTAC-a bildirilib ki, əvvəlcə Ulu Öndər Heydər Əliyevin Sumqayıt şəhərində ucaldılan abidəsi ziyarət olunub.
Tədbir ölkəmizin ərazi bütövlüyünün qorunması uğrunda mübarizədə şəhid olmuş qəhrəman Vətən oğullarının əziz xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.
Dini Qurumlarla İş üzrə Dövlət Komitəsinin sədri Mübariz Qurbanlı açılış nitqi ilə çıxış edərək regionlarda keçirilən belə maarifləndirmə tədbirlərinin dövlətin din siyasətini müasir çağırışlarla uzlaşdırmaq və qarşıda duran hədəfləri müəyyənləşdirmək baxımından əhəmiyyətli olduğunu bildirib
Digər çıxış edənlər - Sumqayıt Şəhər İcra Hakimiyyəti başçısının birinci müavini Teymur Səmədov, Milli Məclisin deputatları Hicran Hüseynova, Tahir Mirkişili, Yeni Azərbaycan Partiyası(YAP) Sumqayıt şəhər təşkilatının sədri Ramiz Hüseynov, Sumqayıt şəhər Ağsaqqallar Şurasının sədri Təbrik Quliyev və Qafqaz Müsəlmanları İdarəsinin bölgə qazısı Rauf Sərdarov Ümummilli Liderin ölkəyə rəhbərliyi dövründə Sumqayıtın sürətlə və uğurla inkişaf edən şəhərlərdən biri olduğunu vurğulayıblar. Sumqayıtın sosial-iqtisadi inkişafında, əhalinin yaşayışının, sosial rifahının yaxşılaşmasında Heydər Əliyevin xidmətləri diqqətə çatdırılıb.
Natiqlər, həmçinin ailə institutunun möhkəmləndirilməsi məqsədilə milli-mənəvi dəyərlərin əhali arasında düzgün təbliğinin, qadın və uşaq hüquqları sahəsində maarifləndirmə işlərininin daha da gücləndirilməsinin önəmi barədə fikirlərini bölüşüblər. Bildiriblər ki, Azərbaycan cəmiyyəti nə qədər tolerant və multikultural dəyərlərə sadiq olsa da, dini maarifləndirmə tədbirləri bu dəyərlərin qorunub saxlanılması və davam etdirilməsi baxımından olduqca önəmlidir. Qeyd edilib ki, respublikamızda xalqımızın mənəvi sərvətləri olan dini ibadətgahların, məscidlərin və digər dini ayinlərin icra olunduğu məkanların təmirinə və bərpasına xüsusi diqqət ayrılır. Bu gün Azərbaycanda yeni-yeni dini ibadətgahların tikintisi də bu siyasətin bariz nümunəsidir.
Qeyd edək ki, konfrans işini aprelin 29-dək davam etdirəcək.
Xəbərdən istifadə edərkən istinad etmək vacibdir.
