Sumqayıt şəhər Gənclər və İdman Baş İdarəsinin və Təhsil Şöbəsinin birgə təşkilatçılığı ilə N saylı hərbi hissədə "Şahin” Respublika hərbi-idman oyununun şəhər birinciliyinin final mərhələsi keçirilib. Yarış böyüməkdə olan nəslin vətənpərvərlik tərbiyəsinə diqqət və qayğını daha da artırmaq, məktəbliləri hərbi-idman oyunlarına cəlb etməklə onların ordu sıralarında xidmətə hazırlanmasına kömək göstərmək məqsədilə keçirilir. Hərbi-idman oyununun şəhər birinciliyinin final mərhələsində 12 ümumtəhsil məktəbinin – İ.Qayıbov adına 1 №-li, 4 №-li, 9 №-li, 14 №-li, 16 №-li, 21 №-li, 23 №-li, 24 №-li, Şah İsmayıl Xətai adına 30 №-li, 43 №-li tam orta məktəblərin, Təbiət Elmləri Təmayüllü Gimnaziyanın və Fars-ingilis dilləri təmayüllü orta internat məktəbinin VIII və X siniflərinin şagirdlərindən ibarət komandalar iştirak ediblər. İlk öncə yarış iştirakçılarının Bayraq Meydanından Heydər Əliyev prospekti və Sülh küçəsi boyunca Ümummmilli Lider Heydər Əliyevin şəhərdəki abidəsinə qədər hərbi mahnıların sədaları altında təntənəli keçidi baş tutub. Məktəblilər "sıra hazırlığı”, "darağa patronun doldurulması və boşaldılması”, "avtomatın sökülməsi və yığılması”, "tüfəngdən hədəfə atəş açmaq” və digər mərhələlər üzrə yarışıblar. Yarışın nəticələrinə əsasən Təbiət Elmləri Təmayüllü Gimnaziyanın komandası I yerə, 9 №-li tam orta məktəbin komandası II yerə, İ.Qayıbov adına 1 №-li tam orta məktəbin komandası isə III yerə layiq görülüblər. Bu mərhələdə I yeri tutan komanda aprelin 20-də Xaçmaz şəhərində keçiriləcək zona birinciliyində Sumqayıtı təmsil edəcəkdir.
Xeberle.com