Aprelin 8-də Fövqəladə Hallar Nazirliyinin Sumqayıt Regional Mərkəzi ilə Sumqayıt Bələdiyyəsinin qarşılıqlı razılaşma planı üzrə Bələdiyyə kollektivi üçün "Fövqəladə hallar zamanı davranış və yanğın təhlükəsizliyi” mövzusunda maarifləndirmə xarakterli ilk seminar keçirilmişdir.

Regional Mərkəzin baş zabiti Elman Rəhimov tədbir iştirakçılarına seminarın məqsədi barədə qısa məlumat verərək,  əhalinin bütün təbəqələrinin fövqəladə hallar baş verdikdə mümkün təhlükələrin qarşısının alınmasında müəyyən məlumat, bilik və vərdişlərə malik olmalarının xüsusi əhəmiyyət kəsb etdiyini bildirmişdir.

Tədbirdə çıxış edənlər - Mərkəzin ərazi orqanları ilə iş şöbəsinin baş məsləhətçisi Ceyhun Şabanov təbii və texnogen hadisələr, o  cümlədən zəlzələ, subasma, istehsalatda, ictimai və məişət binalarında baş verə biləcək qəzalar, yanğın təhlükəsizliyi üzrə məsləhətçi Murad Qarayev yanğın təhlükəsizliyi tədbirləri, baş məsləhətçi Vüqar Rüstəmov qaz və elektrik cihazlarından təhlükəsiz istifadə qaydaları, xüsusi xilasetmə hissəsinin həkimi Arzu Babazadə qəzalar zamanı zərərçəkənlərə ilkin tibbi yardımın göstərilməsi barədə Bələdiyyə işçilərinə məlumat vermişlər.   

Tədbirin sonunda Fövqəladə Hallar Nazirliyinin fəaliyyətindən bəhs edən videosüjet nümayiş etdirilmiş, Bələdiyyə işçilərini maraqlandıran suallara aydınlıq gətirilmişdir.

Orxan MƏMMƏDZADƏ.

Fotolar Amil Əhmədovundur.