Yeni Azərbaycan Partiyası Sumqayıt şəhər təşkilatının təşkilatçılığı ilə Ümummilli lider Heydər Əliyevin 100 illik yubileyi çərçivəsində Azərbaycan Yazıçılar Birliyinin nəşr etdirdiyi "Əbədi ömrün yüz ili” kitabının təqdimatı keçirilib.
"İki sahil” xəbər verir ki, tədbirdə YAP İdarə Heyətinin üzvü, YAP Sumqayıt şəhər təşkilatının sədri Ramiz Hüseynov, Sumqayıt şəhər İcra Hakimiyyəti başçısının birinci müavini Teymur Səmədov, Azərbaycan Yazıçılar Birliyinin sədri, Xalq yazıçısı Anar, YAP İdarə Heyətinin üzvü, filologiya elmləri doktoru Elnarə Akimova, Milli Məclisin deputatı Müşfiq Məmmədli, Azərbaycan Yazıçılar Birliyinin katibi, Azərbaycan Respublikasının Əməkdar İncəsənət xadimi Elçin Hüseynbəyli, "Ədəbiyyat” qəzetinin baş redaktoru Azər Turan, Özbəkistanlı yazıçı, əməkdar jurnalist Məmmədqul Həzrətqulov, Şəhər ictimaiyyətinin nümayəndələri, tanınmış ziyalılar iştirak ediblər.
Tədbirdə əvvəlcə ulu öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirələri bir dəqiqəlik sükutla yad edilib.
Tədbiri giriş sözü ilə açan Ramiz Hüseynov əvvəlcə qonaqları salamlayıb, ümummilli lider Heydər Əliyevin Azərbaycan xalqı və dövləti qarşısındakı tarixi xidmətlərindən, zəngin həyatı və çoxşaxəli fəaliyyətindən, eləcə də təqdim olunan kitabın əhəmiyyətindən danışıb.
Azərbaycan Yazıçılar Birliyinin sədri, Xalq yazıçısı Anar çıxış edərək Ümummilli Lider Heydər Əliyevin Azərbaycan mədəniyyətinə göstərdiyi diqqət və qayğıdan, ədəbiyyatımızın inkişafındakı misilsiz xidmətlərindən danışıb. Anar bildirib ki, Heydər Əliyev hər xalqa, bəlkə də əsrdə bir dəfə qismət olan qənimət, nadir şəxsiyyət idi. Ulu Öndərimizin, müdrik dövlət xadiminin müstəqillik illərində Azərbaycana rəhbərlik etdiyi mərhələ sabitlik, tərəqqi dövrü kimi tarixə həkk olunub. Azərbaycanda uğurlu dövlət quruculuğu həyata keçirilib, bütün sahələrdə köklü islahatlar aparılıb, ölkəmizin beynəlxalq əlaqələri inkişaf etdirilib, dünyada mövqeyi möhkəmlənib. Ona görə də dövlətçilik tariximizin Heydər Əliyev dönəmi Azərbaycan xalqının və tarixin yaddaşında sabitlik, rifah, yüksəliş, intibah anlayışları ilə assosiasiya olunur. Xalqımız həm də ona görə xoşbəxtdir ki, Heydər Əliyev ideyaları yaşayır, onun siyasəti layiqli varisi və alternativsiz siyasətinin uğurlu davamçısı Prezident İlham Əliyev tərəfindən müvəffəqiyyətlə həyata keçirilir.
İncəsənət xadimi Elçin Hüseynbəyli qeyd edib ki, tarix uzaqlaşdıqca biz Ulu Öndər Heydər Əliyev dühasının əzəmətini, onun şəxsiyyətinin böyüklüyünü daha aydın dərk edirik. Əslində bu qeyri-adi şəxsiyyət hər zaman bizim əhatəmizdədir. Çünki Ulu Öndərin layiqli davamçısı prezidentimiz İlham Əliyev Heydər Əliyevin şah əsəri olan müstəqil Azərbaycanı məhz onun miras qoyduğu dövlətçilik prinsipləri ilə idarə edir, onun imkan tapıb həyata keçirə bilmədiyi idealları reallığa çevirir. Bu misilsiz şəxsiyyətin xalqımız üçün etdiyi işlərin möhtəşəmliyini, tarixi dəyər və miqyasını əhatə etmək olduqca çətindir. Heydər Əliyevin miras qoyduğu sərvətlər içərisində onun zəngin nəzəri irsi xüsusi yer tutur. Bu irs bizim milli sərvətimizdir. Bu qiymətli irsin mühüm bir hissəsini onun mədəniyyət, ədəbiyyat və incəsənətin müxtəlif növ və janrları haqqında nəzəri konsepsiyaları müəyyənləşdirir. Heydər Əliyev Azərbaycanı, Azərbaycan xalqını sevən və onu ucalara qaldıran, dövlətçiliyi yaradan, qoruyan bir rəhbər olmaqla bərabər həm də ədəbiyyatı qəlbən sevən böyük bir şəxsiyyət idi.
Özbəkistanlı yazıçı, əməkdar yurnalist Məmmədqul Həzrətqulov çıxışında Özbəkistan və Azərbaycan ədəbiyyatları arasındakı bağlılıqdan söz açıb. Müasir dövrdə türk xalqları arasında mövcud olan mədəni əlaqələrin bu xalqların tarixi keçmişinə əsaslandığını bildirən natiq qeyd edib ki, Azərbaycan xalqının ümummilli lideri Heydər Əliyev bu məsələyə böyük önəm verirdi.
Daha sona YAP İdarə Heyətinin üzvü Elnarə Akimova, Sumqayıt şəhər İcra Hakimiyyəti başçısının birinci müavini Teymur Səmədov, Şöhrət ordenli Əməkdar müəllim Ofelya Babayeva, "Ədəbiyyat” qəzetinin baş redaktoru Azər Turan, Sumqayıt şəhər Poeziya Evinin rəhbəri İbrahim İlyaslı, ictimaiyyət nümayəndələri, tanınmış ziyalılar çıxışlar edərək Ümummilli Lider Heydər Əliyevin Azərbaycanın inkişafında, müstəqilliyimizin möhkəmləndirilməsində əvəzsiz xidmətlərindən, ölkəmizdə ədəbiyyat sahəsinin inkişafına göstərilən dövlət qayğısından danışıblar.
Xəbərdən istifadə edərkən istinad etmək vacibdir.
