Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidməti FHN-in Sumqayıt Regional Mərkəzi ilə birgə Sumqayıt şəhərində, Cənub Regional Mərkəzi ilə isə Lənkəran və Astara rayonlarında "Su hövzələrində təhlükəsizliyin təmin olunması” mövzusunda müşavirələr keçirib.
FHN-dən Xeberle.com-a verilən məlumata görə, müşavirələrdə müvafiq olaraq şəhər və rayon icra hakimiyyətlərinin, inzibati ərazi dairəsi üzrə nümayəndəliklərin, bələdiyyələrin, polis və təhsil şöbələrinin, təcili tibbi yardım bölmələrinin, yerli gigiyena və epidemiologiya mərkəzlərinin və digər aidiyyəti qurumların məsul şəxsləri iştirak edib.
Tədbirlərdə sözügedən rayonların ərazisindəki su hövzələrində keçirilən monitorinqlərin nəticələri barədə məlumat verilib, aşkar olunmuş nöqsanlar fotoslaydlarla nümayiş olunaraq onların aradan qaldırılması yolları geniş müzakirə olunub.
Müşavirələrdə çıxış edənlər, həmçinin yay mövsümündə çimərliklərdə vətəndaşların təhlükəsizliyinin təmin olunması qaydaları, maarifləndirmə işinin vəziyyəti, ölkə ərazisindəki su hövzələrində həyata keçirilmiş aidiyyəti təhlükəsizlik tədbirləri ilə bağlı məlumatlar veriblər.
Sonda "Su hövzələrində təhlükəsizlik və davranış qaydaları” mövzusunda videoçarx nümayiş olunub.
Xəbərdən istifadə edərkən istinad etmək vacibdir.
