İyulun 4-də Azərbaycan Dillər Universitetində (ADU) 2022/2023-cü tədris ilində bakalavriat və magistratura səviyyələrində təhsillərini başa vuran tələbələrin "Məzun günü” keçirilib.
Xeberle.com xəbər verir ki, tədbirdə deputat Müşfiq Məmmədli, həmkarları, universitetin professor-müəllim heyəti, ictimaiyyət nümayəndələri, müxtəlif dövlət qurumlarının əməkdaşları, səfirlər və diplomatlar ilə birlikdə iştirak edib.
"Məzun günü” tədbiri Azərbaycan Respublikasının Dövlət Himninin səsləndirilməsi ilə başlayıb.
Daha sonra "Gaudeamus” tələbə himni səslənib.
ADU-nun rektoru, akademik Kamal Abdulla qonaqlara universitetdə tədris edilən ixtisaslar və ali təhsil müəssisəsinin beynəlxalq əlaqələri haqqında ətraflı məlumat verib. Bildirib ki, ADU-nun 6 min tələbəsi var. 2022-2023-cü tədris ilində universitetin 1500-ə yaxın tələbəsi məzun olur.
Qeyd olunub ki, Azərbaycan Dillər Universiteti "Müasir dillər” üzrə dünyada 1500 universitet arasında ən yaxşı 301 - 340 universitetlər qrupuna daxil olub. Bildirilib ki, bu uğurun memarları bütün ADU əməkdaşlarıdır.
Biz də öz növbəmizdə ADU-nun qazandığı uğurlardan, bu ali təhsil ocağının genişlənən beynəlxalq əlaqələrindən danışıb, gənclərə gələcək həyatlarında uğurlar arzuladıq, təhsildə yüksək nəticələr göstərmiş tələbələrə diplom və fəxri fərmanlar təqdim etdik.
Xəbərdən istifadə edərkən istinad etmək vacibdir.
