Əsası Ulu Öndər Heydər Əliyev tərəfindən qoyulmuş Azərbaycan-Çin münasibətləri son 30 il ərzində daha da inkişaf etmiş və dərinləşmişdir. Dünyanın aparıcı dövlətləri ilə səmimi və qarşılıqlı hörmətə əsaslanan əməkdaşlığı uğurla davam etdirən ölkə başçımız Cənab İlham Əliyev Çin dövləti ilə də əməkdaşlığa hər zaman xüsusi önəm verir. Dövlətlərimiz arasında iqtisadi əlaqələrin genişləndirilməsi baxımından çox böyük perspektivlər mövcuddur. Bir məqamı da vurğulamaq lazımdır ki, iqtisadi əməkdaşlıq dünyada sülhün və əmin-amanlığın təmin olunmasının əsas vasitələrindən biridir.
Daim mətbuat nümayəndələri ilə sıx ünsiyyətə can atan Cənab İlham Əliyevin 22 iyul 2023-cü il tarixində "China Global Television Network” televiziya kanalında yayımlanmış müsahibəsində həm Çin-Azərbaycan əlaqələri, həmçinin dünyada ədalətin və beynəlxalq hüququn qorunması məsələləri ilə bağlı maraqlı fikirlər öz əksini tapmışdı. Bütün bu məsələlərlə bağlı Azərbaycan Respublikasının Prezidenti Cənab İlham Əliyev dövlətimizin beynəlxalq hüququn norma və prinsiplərinə əsaslanan ədalətli mövqeyini media nümayəndələrinin diqqətinə çatdırdı. Dövlət başçımız tərəfindən bildirildi ki, Azərbaycan Respublikası bəzi ölkələrdən fərqli olaraq öz prioritetlərinə və milli maraqlarına cavab verməyən hər hansı bir prosesə qoşulmur. Azərbaycan dövləti yalnız və yalnız öz milli maraqlarına söykənən siyasət yürüdür. Bu siyasi kursun əsasları Ulu Öndər Heydər Əliyev tərəfindən müəyyənləşdirilmişdir və hal-hazırki dövrdə də Azərbaycan dövləti tərəfindən bu siyasət uğurla davam etdirilir.
Dövlət başçımızın "China Global Television Network” televiziya kanalına müsahibəsində Fransa dövlətinin ermənipərəst mövqe tutması da xüsisi vurğulandı. Qeyd olundu ki, artıq Fransa Ermənistanın ən böyük vəkilinə çevrilib. Halbuki hətta müasir dövrdə belə Fransa hələ də öz müstəmləkəçilik siyasətini davam etdirir. Bu cür ədalətsizliklər beynəlxalq təhlükəsizliyə ciddi təhdidlər yaradır. Azərbaycan və Çin dövlətləri isə hər zaman beynəlxalq hüququn normalarına və ərazi bütövlüyü prinsipinə birmənalı olaraq hörmətlə yanaşmışlar. Azərbaycan Respublikası Çin Xalq Respublikasının ərazi bütövlüyünü, Vahid Çin, Çinin birləşməsi siyasətini hər zaman dəstəkləyir və dəstəkləməkdə də davam edəcəkdir. Xalqların öz müqəddəratını təyin etməsi hər hansı ölkənin ərazi bütövlüyü ilə ziddiyyət təşkil etməli deyil. Bu, beynəlxalq hüququn fundamental prinsipləridir.
"China Global Television Network” televiziya kanalının müxbirinin idmana münasibətlə bağlı sualını da ölkə başçımız özünəməxsus şəkildə cavablandıraraq bildirdi ki, Avropa Liqasının 2019-cu ildəki final matçı və UEFA 2020-ci ilin matçları 2021-ci ildə Bakıda keçirildi.Bakı artıq böyük idman tədbirləri üçün beynəlxalq məkana çevrilib. 2015-ci ildə ilk Avropa Oyunları və 2017-ci ildə İslam Həmrəyliyi Oyunları bir şəhərdə cəmi iki il ərzində keçirilib. Bu, bir daha Azərbaycanı idman ölkəsi kimi nümayiş etdirir.
Nigar Qocayeva
YAP Sumqayıt şəhər təşkilatının məsləhətçisi
Xəbərdən istifadə edərkən istinad etmək vacibdir.
