Son günlər bölmələrimizin sayıqlığı nəticəsində Ermənistan silahlı qüvvələrinə məxsus 2 ədəd "DJI Mavic 3" kvadrokopteri xüsusi texniki vasitələrlə endirilərək ələ keçirilib. Ermənistanın sərhəddə kəşfiyyat uçuşları həyata keçirməsi Azərbaycan mövqelərinin koordinatlarını çəkmək və təxribatlar təşkil etmək hazırlıqları kimi başa düşülə bilər.
Hərbi ekspert Ədalət Verdiyev bununla bağlı "Unikal"a bildirib ki, Ermənistan tərəfinin mövqelərimiz üzərində kvadrokopterlər vasitəsilə kəşfiyyat aparmağa cəhd etməsi bir daha onların ölkəmizə qarşı ərazi iddialarında əl çəkmədiyini və növbəti təxribatlara hazırlaşdığını nümayiş etdirir.
Ekspert qeyd edib ki, Ermənistanın dəfələrlə olan belə addımları Azərbaycan tərəfindən təmkinlə qarşılansa da, bunun da həddi-hüdudu olmalıdır:
"Hesab edirəm ki, bu fəaliyyətləri həyata keçirən idarəetmə məntəqələrinin sıradan çıxarılmasının zamanı çatıb. Belə ki, PUA-ların idarəetmə məntəqələrinin və onların tətbiqinə dair qərar verən obyektlərin sıradan çıxarılmaması gələcəkdə Azərbaycana qarşı daha geniş miqyasda təxribatlar həyata keçiriləcəyini ehtimal etməyə əsas verir", - deyə Ə.Verdiyev vurğulayıb.
Xəbərdən istifadə edərkən istinad etmək vacibdir.
