15-18 avqust tarixləri çərçivəsində Mənəvi Dəyərlərin Təbliği Fondunun təşkilatçılığı ilə Oğuz rayonunda Fondun könüllüləri və tələbələr üçün "Yay məktəbi" keçirilir. Açılış mərasimində Fondun icraçı direktoru Mehman İsmayılov, Dini Qurumlarla İş üzrə Dövlət Komitəsinin Şəki bölgəsi üzrə şöbəsinin müdiri Taleh Abdullayev, Oğuz Rayon İcra Hakimiyyətinin nümayəndəsi Nicat Kərimov, YAP Oğuz təşkilatının sədr müavini Mehman Ramazanov, Oğuz rayon Gənclər və idman sektorunun müdiri Şaiq Rüstəmovun məruzələri dinlənilib. Çıxışlar zamanı bildirilib ki, belə tədbirlərin təşkil edilməsində əsas məqsəd milli-mənəvi dəyərlərimizin inkişafında, maddi-mədəni irsimizin qorunmasında, həmçinin tarixən formalaşmış dəyərlərimizin gələcək nəsillərə ötürülməsində könüllülərin rolunu artırmaqdır.
Yay düşərgəsi çərçivəsində Bakı Beynəlxalq Multikulturalizm Mərkəzinin Analitik şöbəsinin müdiri Rəşad İlyasovun "Ekoetikanın aktuallığı", gənc tarixçi Kənan Məmmədovun "Tarix və onun öyrənilməsi metodları" mövzusunda mühazirəsi dinlənilib. İnteraktiv sual-cavab formatında təşkil edilən seminarlar zamanı iştirakçılarla maraqlı fikir mübadiləsi aparılıb.
Daha sonra Oğuz rayonunda yerləşən Tarix-diyarşünaslıq muzeyi, dağ yəhudilərinin sinaqoqu və Oğuz şəhər "Cümə "məscidi ziyarət edilib.
Yay düşərgəsində asudə vaxtın faydalı və maraqlı keçirilməsi məqsədilə Fondun sifarişi ilə hazırlanan "Heydər Əliyev 100 - mənəviyyata bağlı ömür" sənədli filmi nümayiş olunub və əyləncəli oyunlar keçirilib.
Xatırladaq ki, "Yay məktəbi" səmərəli və əyləncəli proqramı ilə davam etdirilir.
Xəbərdən istifadə edərkən istinad etmək vacibdir.
