Sumqayıtda yerləşən Qubadlı Rayon İcra Hakimiyyətində aprelin 16-da cari ilin birinci rübünün sosial-iqtisadi inkişafının yekunları və qarşıda duran vəzifələrə həsr edilmiş hesabat yığıncağı keçirilib. Hesabat yığıncağında icra hakimiyyətinin məsul işçiləri, idarə, müəssisə rəhbərləri və ictimaiyyət nümayəndələri iştirak ediblər.
Yığıncağı rayon icra hakimiyyətinin başçısı Malik İsaqov açıb. Qeyd olunub ki, əvvəlki dövrlərdə olduğu kimi cari ilin birinci rübündə də ölkəmizin sosial-iqtisadi inkişafı uğurla davam edib, iqtisadi siyasətin inkişaf istiqamətləri üzrə əhəmiyyətli işlər görülüb, nəticədə ölkə əhalisinin rifah halı xeyli dərəcədə yaxşılaşıb. Dövlətimizin başçısı İlham Əliyev Nazirlər Kabinetinin 2015-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr edilmiş yığıncağında ötən üç ayı ölkəmiz üçün uğurlu bir dövr kimi qiymətləndirib, həyata keçirilən tədbirlərin, əldə edilən nailiyyətlərin sonrakı dövrlər üçün də dinamik inkişafa təminat verdiyini vurğulayıb.
Sonra rayon icra hakimiyyəti başçısının müavini Sahib Əliyev 2015-ci ilin birinci rübündə rayonda görülmüş işlərdən bəhs edən məruzə ilə çıxış edib. O, rayonda məcburi köçkünlərin mənzil-məişət şəraitinin yaxşılaşdırılması, kommunal problemlərinin həlli istiqamətində həyata keçirilən tədbirləri diqqətə çatdırıb. Bildirilib ki, cari ilin birinci rübündə Beyləqan rayonunda məskunlaşan 1 ailə, Saatlı rayonunda isə 5 ailə yeni mənzillə təmin edilib, H.Z.Tağıyev qəsəbəsində Kosmonavtika yaşayış massivində 23 saylı binanın, yenə həmin qəsəbədə Şirvan yaşayış massivində köçkünlər yaşayan binanın, eləcə də Stalçay qəsəbəsində iki sakinin mənzillərinin dam örtükləri təmir olunub. Cari ilin birinci rübündə rayon icra hakimiyyəti tərəfindən vətəndaşlara mənzil şəraitlərinin yaxşılaşdırılması üçün 3 ailəyə tikinti materialları, 3 ailəyə isə maliyyə vəsaiti ilə kömək edilib.
Hesabat məruzəsində məskunlaşma yerlərində elektrik təchizatı ilə bağlı problemlərin aradan qaldırılması işlərindən də bəhs olunub, əldə edilən uğurlardan danışılıb.
Sonra rayon mərkəzi xəstəxanasının baş həkimi Nüsrət Əhmədovun, maliyyə idarəsinin müdiri Kəmaləddin Rüstəmovun, məşğulluq mərkəzinin direktoru Əkbər Qurbanəliyevin, Dövlət Sosial Müdafiə Fondunun rayon şöbəsinin müdiri Cəlaləddin Məmmədovun və rayon icra hakimiyyəti başçısının Qubadlı şəhər inzibati ərazi dairəsi üzrə nümayəndəsi İlyas Süleymanovun məruzə ilə bağlı çıxışları dinlənilib.
Sonda yığıncaqda qərar layihəsi qəbul edilib.  (azertag.az)