Son dövrün aktual məsələləri çərçivəsində sahibsiz heyvanlarla mübarizə diqqət mərkəzində qalır. Sahibləri tərəfindən azdırılan, küçələrə atılan itlər, pişiklər və digər heyvanlar sahibsiz adı altında yaşamağa davam edirlər. Daha çox küçələrə insanlar tərəfindən toplum halda zibillərin atılması sahibsiz heyvanlardan ibarət dəstələrin artmasına səbəb olur. Onu da vurğulayaq ki, sahibsiz itlər arasında quduzluğa tutulmuşlar üstünlük təşkil edir. Nəzərə alsaq ki, orta məktəb şagirdlərinin heç də hamısı dərsə valideyni ilə gedib-gəlmir. Bu, o deməkdir ki, orta məktəbdə təhsil alan hər bir şagirdin həyatı, sağlamlığı təhlükə altındadır və məktəblərdə bunun qarşısının alınması üçün heç bir şərait qurulmayıb.
Düzdür ki, son vaxtlar sahibsiz itlər həddən artıq çoxalıb. Amma bu problem Sumqayıtda daha qabarıq özünü göstərir və sakinləri narahat edir. Şəhərin hər yerində küçə itlərini görmək mümkündür. Şəhərdə vəziyyət o yerə çatıb ki, sahibsiz itlər sürü halında şəhərin mərkəzi hissələrində, mikrorayonlarda, binaların həyətlərində, parklarda rahat şəkildə gəzərək, insanları narahat edirlər. Hətta şəhərin elə yerləri var ki, axşamlar həmin ərazidən keçmək mümkün olmur.
Şəhər sakinlərini narahat edən bu canlılar insanların həyatı üçün təhlükəyə çevrilib. Onlar küçələrdə sərbəst hərəkət etməyin mümkünsüz olduğunu deyir və quduzluğun yayılmasından narahatdırlar. İşə tələsən sakinlər və məktəbə gedən şagirdlər itlərin kütləvi hücumuna məruz qalırlar. Sumqayıtda sahibsiz itlərin ən çox müşahidə edildiyi yer isə Dəmiryolu Stansiyasının ətrafıdır. İş o yerə çatıbki sahibsiz itlər stansiyanın daxilində sərnişinlərlə birgə addımlayır.
Xəbərlə.com-un əməkdaşı problemi araşdırmaq üçün şəhərdə müşahidələr aparıb. Təhlükə gecə saatlarında daha çox özünü biruzə verir və heç kəs sahibsiz itlərin hücumundan sığortalanmayıb. Sakinlər qeyd edir ki, sahibsiz itlər insanları, xüsusilə də azyaşlıları narahat edir, həm də məişət tullantılarını ətrafa dağıtmaqla natəmizliyə səbəb olurlar.
Xüsusilə vurğulayaq ki, Sumqayıtda il ərzində it dişləməsi halları çox baş verir. Bu məsələ yalnız ölüm faktı olduqda gündəmə gəlir. Görünür ki, problemlə birbaşa məşğul olan aidiyyatı qurum da yoxdur. Ümid edirik ki, qurumlar tərəfindən həm şəhərimizin təmiz saxlanılmasına, həm də sahibsiz itlərin təcrid olunmasına diqqət daha da artırılacaq.
Elşən Yəhyayev
Xəbərdən istifadə edərkən istinad etmək vacibdir.
