Bu ilin ilk 9 ayında mənzil bazarında qiymətlər 10 faiz artıb. Bununla bağlı məlumatı Dövlət Statistika Komitəsi açıqlayıb. Müşahidələrə görə, 2023-cü ilin üçüncü rübü ərzində mənzillərin dəyəri orta hesabla 2,8 faiz, ötən ilin üçüncü rübü ilə müqayisədə isə 10,1 faiz artıb.
Ekspertlərin fikrincə, mənzillərin qiymətləri bu il sürətlə artmağa başlayıb.
Bəs Bakı ilə müqayisədə Sumqayıtda qiymət artımı varmı? Mövzu ilə bağlı iqtisadçı ekspert Eldəniz Əmirovla danışdıq. O qeyd etdi ki, Sumqayıtda mənzillər aşağı qiymətə satılsa da, insanlar yenə də işlə bağlı Bakıda kirayə qalmağı seçirlər:
"2023-cü ilin 9 ayı ərzində Respublikada yaradılmış iş yerlərinin 80 faizdən bir qədər də artığı məhz Bakının payına düşür. Yəni iş yerlərinin Bakının payına bu qədər yuxarı düşdüyü halda, regionlarda, o cümlədən də Sumqayıtda mənzillərin aşağı qiymətə satılması belə Bakının yüklənməsinin qarşısını ala bilməyəcək. Çünki yolların vəziyyəti hər kəsə məlumdur. Sumqayıtda və Abşeronda tıxacların vəziyyəti səbəbindən insanlar Bakıda kirayə qalaraq həyatlarını qururlar”.
Elşən Yəhyayev
Xəbərdən istifadə edərkən istinad etmək vacibdir.
