İqtisadi Zonaların İnkişafı Agentliyinin Peşə Təhsil Mərkəzinin tələbələrinin Ulu öndər Heydər Əliyevin 100 illiyinə həsr olunmuş tədbirlər çərçivəsində Heydər Əliyev Mərkəzinə tanışlıq səfəri təşkil edilib.
Ziyarət zamanı tələbələrə Azərbaycan xalqının Ümummilli lideri, dünyaşöhrətli siyasətçi Heydər Əliyevin zəngin həyat və fəaliyyəti barədə ətraflı məlumat verilib. Diqqətə çatdırılıb ki, Mərkəzdə Ulu öndər Heydər Əliyevin həyat və fəaliyyətinin bütün dövrlərini əhatə edən fotolar, arxiv sənədlərinin surətləri, eləcə də müxtəlif eksponatlar nümayiş etdirilir.
Eyni zamanda səfər çərçivəsində təhsil müəssisəsinin tələbələri "Uzun Həsən - Ağqoyunlu dövlətinin hökmdarı” sərgisinin fəaliyyəti ilə də tanış olublar. Tələbələrə Uzun Həsənə həsr olunmuş sərgidə dövlət xadimi və sərkərdənin həyatı, onun yaratdığı Ağqoyunlu dövlətinə dair məlumatlar təqdim edilib. Səfər iştirakçıları tərəfindən bir çox nadir eksponatlara, o cümlədən İstanbuldakı Hərb Muzeyində (Harbiye Askeri Müzesi ve Kültür Sitesi Komutanlığı) saxlanılan və indiyə qədər Türkiyə hüdudlarından kənara çıxarılmayan tarixi nümunələrə baxış keçirilib.
Bununla yanaşı, Heydər Əliyev Mərkəzinə səfər zamanı tələbələr Azərbaycan tarixinə, musiqisinə və mədəniyyətinə həsr olunan ekspozisiya və sərgi zalları ilə də tanış olublar.
Xəbərdən istifadə edərkən istinad etmək vacibdir.
