Dekabrın 29-da Dövlət Ekoloji Ekspertiza Agentliyində (DEEA) Bakı şəhəri üzrə yaşıllıqların götürülməsinə dair verilmiş rəylərin icra vəziyyəti ilə bağlı ictimai dinləmə keçirilib.
Xeberle.com AZƏRTAC-a istinadən xəbər verir ki, tədbirdə yaşıllıqların götürülməsi, mühafizəsi, ekoloji vəziyyətin yaxşılaşdırılması istiqamətində mövcud problemlər və görüləcək işlər müzakirə edilib.
Qeyd olunub ki, 2023-cü ildə Bakı şəhəri üzrə rayon icra hakimiyyətlərindən Nizami rayon üzrə 68, Nəsimi rayonu üzrə 67, Yasamal rayonu üzrə 42, Binəqədi rayonu üzrə isə 24 müraciət qəbul olunub. Bu müraciətlərdən ümumilikdə 45-nə müsbət rəy verilib. Müraciətlərin az bir hissəsi isə sənədlərin düzgün formada təqdim olunmaması nəticəsində imtina olunub.
Əsas məqsədin yaşıllıqların mümkün dərəcədə qorunması, artırılması, götürülməsinə rəy verilmiş ağacların öncədən ayrılmış ərazilərə standartlara uyğun qaydada köçürülməsi, yaşıllıqların bioloji inkişafdan qalmasına yol verilməməsi və sonrakı illərdə də onlara mütəmadi düzgün aqrotexniki qulluq göstərilməsi olduğu vurğulanıb.
Agentlik daxilində fəaliyyət göstərən Rəy və icazələrin monitorinqi şöbəsinin əməkdaşları tərəfindən bir müddət sonra həmin ərazilər üzrə monitorinq keçiriləcəyi və nəticələr barədə məlumatların təqdim olunacağı diqqətə çatdırılıb.
Xəbərdən istifadə edərkən istinad etmək vacibdir.
