Mayın 1-də Sumqayıt Dövlət Universitetində (SDU) Türkmənistanın Azərbaycandakı səfirinin birinci katibi Batır Rəcəbov "Türkmənistanın daimi bitərəfliliyi: müasir erada xarici siyasət strategiyasında yeni keyfiyyət” mövzusunda tələbələrə seminar keçirib.

SDU-nun mətbuat xidmətindən bildirilib ki, tədbiri açan universitetin humanitar məsələlər üzrə prorektoru Nizami Namazov Azərbaycan ilə Türkmənistan arasında fəal əməkdaşlığın həyata keçirildiyini, iqtisadi sahədə əlaqələrin inkişaf etdiyini vurğulayıb. Prorektor ölkələrimiz arasında əlaqələrin dinamizminin bundan sonra da qorunacağına, dost və qardaş xalqlarımız arasında münasibətlərin daha da sıxlaşacağına əmin olduğunu deyib.

B.Rəcəbov 2015-ci ilin Türkmənistanda "Sülh və bitərəflilik ili” elan edildiyini diqqətə çatdırıb və ölkələrimiz arasında əlaqələrin hərtərəfli inkişafı üçün belə tədbirlərin keçirilməsini yüksək qiymətləndirib.

Sonda tələbələrin sualları cavablandırılıb. (azertag.az)