Məlum olduğu kimi, "28 May” metrostansiyasının qarşısına fərdi avtomobillərin girişi qadağan edilib. Əraziyə yalnız marşrut avtobusları daxil ola bilər. Bunun üçün xüsusi nişanlar da quraşdırılıb. Lakin pik saatlarında avtobusların, xüsusilə də 1 nömrəli marşrut avtobusun gecikməsi sərnişinlərin səbr kasasını daşdırır. Buna qədər məcburiyyət qarşısında qalan sərnişinlər taksi ilə getməli olurdu. Lakin maraqlıdır ki, Bakı Dəmiryol Vağzalı burada yerləşsə belə, artıq taksilərin də meydana girişinə imkan verilmir. Xüsusən anlaşılmazdır ki, Bakıdan bölgələrə qatarla səyahət edən, həmçinin bölgələrdən Bakıya qatarla gələn sərnişinlər şəxsi avtomobilləri bir yana, taksiyə minmək üçün uzun yol qət etməlidirlər. Nəzərə alaq ki, qatarla səyahət edən sərnişinlərin əksəriyyəti əli yüklü olur...

Bu halda taksilərin əraziyə buraxılması gözlənilirmi?

Məsələ ilə bağlı Azərbaycan Yerüstü Nəqliyyat Agentliyi (AYNA) ilə əlaqə saxladıq. Qurumun mətbuat katibi Tural Orucov Xeberle.com-a açıqlamasında bildirib ki, Bakı Dəmiryol Vağzalına gəlib-gedənlər üçün qarşılama və yolasalma zonası da təşkil olunacaq: "Fərdi avtomobillərin hərəkətinin məhdudlaşdırıldığı "28 May" metrostansiyasının ətrafında aidiyyəti qurumlarla birgə abadlaşma işləri həyata keçiriləcək. Bu işlər çərçivəsində asfalt örtüyünün dəyişdirilməsi, mikromobillik infrastrukturunun qurulması, o cümlədən velosiped zolaqlarının təşkil edilməsi və piyada zonalarının yaradılması nəzərdə tutulur”.
Nəqliyyat eksperti Elməddin Muradlı açıqlamasında həmin ərazidə taksilərin olmasının vacibliyini vurğulayıb: "Məndə olan məlumata görə, orda taksilərin fəaliyyəti tənzimlənəcək. Yaxın vaxtlarda həmin ərazidə abadlıq-quruculuq işlərinə başlanılacaq. Bununla bağlı həm Bakı şəhər İcra Hakimiyyətinin, həm də Rəqəmsal İnkişaf və Nəqliyyat nazirliyinin rəhbərliyi layihələrə baxış keçirib və təsdiqlənib. Bundan sonra orda asfalt örtüyü dəyişəcək. Ola bilsin ki, ora tamet daşlar da döşənsin. Park formasında iş görülməsi gözlənilir. Bildiyim qədərilə bu layihənin özündə taksi duracağının olması da var. Yəni əraziyə müəyyən sayda taksilər buraxılacaq. Təbii ki, bu, qanunsuz fəaliyyət göstərən taksilərə aid deyil. Qanunauyğun şəkildə işləyən taksi sürücüləri fəaliyyət göstərəcəklər. Çünki, bu elə bir məsələdir ki, orda taksilərin olması vacibdir. İnsanlara bütün ictimai nəqliyyat vasitələri əlçatan olmalıdır. Ümid edirik ki, dediyimiz məqam nəzərə alınacaq”. 
Digər bir nəqliyyat eksperti Eldar Bəşirovun sözlərinə görə, lisenziyası olan taksilərin sözügedən ərazidə fəaliyyəti vacibdir. O bildirib ki, dəmiryol vağzalına xarici qonaqlar da gəldiyi üçün, yüklərin daşınması çətin olacaq. Bu baxımdan, taksilərin fəaliyyəti mütləqdir.