Faşizm üzərində Qələbənin 70 illiyi münasibətilə Qubadlı Rayon İcra Hakimiyyətində Böyük Vətən müharibəsi veteranları ilə görüş keçirilib.
Görüşdə rayon icra hakimiyyətinin başçısı Malik İsaqov çıxış edib. Veteranları təbrik edən M.İsaqov bildirdi ki, 1941-1945-ci illərdə cəbhəyə 640 min nəfər azərbaycanlı yollanıb. Onlar SSRİ məkanında yaşayan digər xalqların nümayəndələri ilə çiyin-çiyinə faşizmə qarşı savaşda iştirak ediblər. Müharibənin ən ağır illərində azərbaycanlı əsgər və zabitlər od-alov püskürən cəbhələrdə, o cümlədən Moskva, Leninqrad, Kiyev, Stalinqrad, Ukrayna, Belarus, Pribaltika respublikaları uğrunda döyüşlərdə cəsarətlə vuruşub, faşist ordu hissələrinə mətanətlə müqavimət göstərib, işğal edilmiş yaşayış məntəqələrinin azad olunmasında fəal iştirak ediblər.
Qeyd olundu ki, Qubadlı rayonu üzrə 3500 nəfər Böyük Vətən müharibəsində iştirak edib. Onlardan da yalnız 1500 nəfəri geri qayıdıb. Hazırda rayonda 16 nəfər Böyük Vətən müharibəsi iştirakçısı var.
Sonra M.İsaqov dövlətimiz tərəfindən müharibə veteranlarına göstərilən diqqət və qayğıdan danışdı. Vurğulandı ki, ölkəmizdə müharibə veteranlarının yubileyləri keçirilir, onlar Qələbənin 70 illik yubileyi münasibətilə medallarla təltif edilirlər. Həmçinin 1941-1945-ci illər müharibəsi əlilləri xüsusi avtonəqliyyatla təmin olunur, Böyük Vətən müharibəsi iştirakçılarına birdəfəlik maddi yardımlar edilir. O cümlədən bu kateqoriyadan olan Qubadlı sakinlərindən 16 nəfərin hər birinə 800 manat, Böyük Vətən müharibəsində həlak olmuş və ya sonralar vəfat etmiş 104 nəfər döyüşçünün dul arvadlarına 400 manat, arxa cəbhədə fədakar əməyinə görə orden və medallarla təltif edilmiş 64 nəfərə 400 manat birdəfəlik maddi yardım olunub.
Çıxış edən veteranlar azərbaycanlıların bu müharibədə göstərdikləri qəhrəmanlıqlardan danışdılar, diqqət və qayğıya görə Prezident İlham Əliyevə minnətdarlıqlarını bildirdilər.
Sonda Böyük Vətən müharibəsi veteranlarına Azərbaycan Respublikası Prezidentinin Sərəncamına əsasən yubiley medalları, eyni zamanda, rayon icra hakimiyyəti adından pul mükafatı təqdim olundu. (azertag.az)
Xəbərdən istifadə edərkən istinad etmək vacibdir.
