Gələn ay Bakıda keçiriləcək I Avropa Oyunları öncəsi paytaxtın bəzi küçə və prospektlərində təmir-tikinti işləri həyata keçirilir. Bakı-Quba-Rusiya Federasiyası sərhədi avtomobil yolunun 11-ci kilometrliyində yerləşən "Xırdalan dairəsi”ndə də bərpa işləri aparılır.

Ərazidə köhnə asfalt-beton örtüyü yenisi ilə əvəzlənir. Bu səbəbdən artıq 2 gündür adı çəkilən ərazidə  və ətraf yollarda nəqliyyat vasitələrinin hərəkəti məhdudlaşdırılıb. Bir tərəfdən yolların abadlaşdırılması sevindirici hal olsa da, digər tərəfdən hər gün bu ərazi ilə hərəkət edərək mənzil başına çatmağa çalışan insanların uzunmüddətli tıxacda qalması əsəbləri əməlli-başlı tarıma çəkir. Hələ bu tıxaclardan istifadə edərək qiymətləri "ceyran belinə” qaldıran dırnaqarası taksi sürücülərinin "fəaliyyəti” çarəsiz insanların saatlarla yolda qalmasına səbəb olur. Gündəlik 5-10 manata işləmək üçün Bakıya üz tutan insanlar geri qayıdarkən ən azı 4-5 manatlarından keçərək evlərinə dönməyə məcbur qalırlar. 1 manata Bakı-Sumqayıt yolu arasında taksi fəaliyyəti ilə məşğul olan sürücülərin qiymətləri 5 AZN-ə qaldırmaları azmış kimi, 50 qəpiklik sərnişindaşıyan Qazellərin 2 manat tələb etməsi insanların səbr kasasını daşırır. 

Dünən işdən çıxıb evə qayıdarkən bir çox insanlar kimi mən də saatlarla yolda qaldım. Dırnaqarası taksi sürücülərinin 4 manata apardıqları yolu sərnişindaşıyan Qazellə 2 manata getsəm də mənzil başına  gecə saatlarında çatmalı oldum. 

Ümid edirik ki, mövcud vəziyyətin yaranmasına səbəb olan qurumlar problemə bir çarə tapacaqlar və insanlar əlavə vəsait xərcləmədən mənzil başına rahat şəkildə çata biləcəklər. (azadxeber.az)