Bu barədə Xeberle.com-a sakinlər bildirib. Lakin məsələ ilə bağlı heç bir tədbir görülməyib. Son müraciət isə 2024-cü ilin aprel ayında Mədəniyyət Nazirliyinə ünvanlanıb və nəhayət əraziyə baxış keçirilməsi üçün AMEA Arxeologiya və Antropologiya İnstitutunun aparıcı elmi işçisi, tarix üzrə fəlsəfə doktoru, dosent Anar Mirsəmid oğlu Ağalarzadə cəlb olunub: "18 may 2024-cü il tarixində Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Salyan Regional İdarəsinin, Cəlilabad rayonu üzrə abidə mühafizəçiləri ilə birgə "Küllütəpə” ərazisinə baxış keçirilib: "Monitorinq zamanı məlum olub ki, 1 hektara yaxın sahəni əhatə edən abidənin böyük bir hissəsi dağıdılıb. Anar müəllim baxış zamanı müəyyən edib ki, abidənin yerləşdiyi sahə çoxtəbəqəli yaşayış məskənidir. Belə ki, onun ən alt qatlarında Xalkolit, Tunc və üst təbəqədə isə son orta əsrlərin maddi mədəniyyət nümunələri aşkar edilir. Abidənin cənub, cənub şərq tərəfdən dağıdılmış kəsik hissəsində kül qatışıqlı təbəqə aydın seçilir və onun mütləq qalınlığı təqribən 5-6 metrə çatır. Yaşayış yerinə baxış keçirilən zaman ətrafda səpələnmiş halda olan saxsı qab fraqmentləri toplanıb."

Alimin sözlərinə görə, ciddi şəkildə dağıntıya məruz qalmış abidədə mütəxəssislər tərəfində tədqiqatlar aparılsa, abidənin hətta dünya əhəmiyyətli statusa malik olması istisna deyil: "Məhz bu səbəbdən ərazidə aparılan qeyri- qanuni işlər təcili şəkildə dayandırılmalı və ilkin mühafizə tədbirləri görülməlidir. Və sonda "Tarix və mədəniyyət abidələrinin qorunması ilə bağlı" Qanunu xatırlatmaq lazımdır. Azərbaycan Respublikası Konstitusiyasının 77-ci maddəsinə görə tarix və mədəniyyət abidələrini qorumaq hər kəsin borcudur. Tarix və mədəniyyət abidələri xalqın milli sərvətidir. Dövlət tarix və mədəniyyət abidələrinin qorunmasına təminat verir, onların elmi tədqiqi və təbliği üçün zəruri olan qurumların yaradılmasını, fəaliyyətini və inkişafını təmin edir, abidələrdən səmərəli istifadə üçün şərait yaradır. Qanunvericilik, icra və məhkəmə hakimiyyəti orqanları, yerli özünüidarə orqanları, siyasi partiyalar, ictimai birliklər, həmkarlar ittifaqları təşkilatları, hüquqi və fiziki şəxslər tarix və mədəniyyət abidələrini qorumalı, onları qorumaqla məşğul olan müvafiq icra hakimiyyəti orqanının müəyyən etdiyi orqana (quruma), yerli özünüidarə orqanlarının yaratdığı təsisatlara və qeyri-dövlət təşkilatlara yardım göstərməlidirlər. Bu maddənin dördüncü hissəsində göstərilən subyektlər tarix və mədəniyyət abidələri yerləşən ərazidə torpaq və ya inşaat işləri görərkən müvafiq icra hakimiyyəti orqanının müəyyən etdiyi elmi təşkilatın rəyi nəzərə alınmaqla müvafiq icra hakimiyyəti orqanının müəyyən etdiyi orqandan (qurumdan) qabaqcadan icazə almalı və belə icazə alındıqdan sonra torpaq və ya inşaat işlərini görərkən müvafiq icra hakimiyyəti orqanının müəyyən etdiyi orqanın (qurumun) və mütəxəssislərin abidələrin qorunması barədə göstərişlərini icra etməlidirlər."