Onu 20 ilə yaxındır ki, tanıyıram. İlk görüşümüzdən sonra mənə elə gəlirdi ki, uzun müddət bələd olduğum bir insanla görüşüb söhbət edirəm. Elə ilk andan onun sadəliyinə, saflığına heyran qalmışdım. Həmin vaxt bir daha yəqin etmişdim ki, ümumiyyətlə, sadəlik insan keyfiyyətlərinin ən ali pilləsidir. Mehriban, güləriz, zəhmətkeş olan, heç vaxt dəyişməyən , ətrafındakı insanların rəğbətini qazanan bu xanımı şəhərimizin ikinci və on dördüncü məhəllələrində az adam tapılar ki, tanımasın.
Haqqında söhbət açdığım Rübabə Atakişi qızı Məclumova 1963-cü ildə Xaçmaz rayonunun Çarxı kəndində anadan olub. Bir müddət Qazaxıstanda yaşayıb. Orta ixtisas təhsilli alıb. 1995-ci ildə Sumqayıt şəhər iki saylı Mənzil İstismar sahəsində təşkilatçı-müəllim kimi əmək fəaliyyətinə başlayıb, 1997-ci ildən isə sahə ustası işləyir. Hazırda on dördüncü məhəllənin on iki binasının sakinlərtinə canla-başla xidmət göstərir. Vaxtaşırı olaraq dalandarlara tapşırıqlar verir, özü də onlarla birlikdə məhəllənin təmizliyi ilə məsul olur. Eyni zamanda, həyətlərin səliqə-sahman işlərinin aparılmasına, məhəllənin problemlərinin həllinə məsuliyyətlə yanaşır, bunun üçün əlindən gələni əsirgəmir.
O, şəhərin ictimai işlərində də fəal iştirak edir. Qadınlar Şurasının üzvü olub. Gözəl ailəsi, iki oğlu və bir qızı var.
Sahə rəisi Şirvan Eminov Rübabə xanım haqqında həmişə yüksək fikirdədir. Onun yaxşı sahə ustası olduğunu, vəzifəsinin öhdəsindən vaxtında, məsuliyyətlə və bacarıqla gəldiyini xüsusi vurğulayır.
Bəli, Rübabə Məclumova öz işinə həssaslıqla yanaşır, hər vasitə ilə sakinlərin problemlərinin tez bir zamanda aradan qaldırılmasına çalışır. Bütün bu keyfiyyətlərinə görə o, kollektivin və yaşayışçıların hörmətini qazanıb. Sakinlərdən Solmaz Əsgərova, Leyla Hacıyeva, Fəridə Həmidova, Sitarə Kərimova, Sevill Novruzova, Firəngiz Mehdiyeva, Rüxsarə Süleymanova və başqaları Rübabə Məclumova haqqında ancaq xoş sözlər deyirlər. Bu xanım təsadüfi deyil ki, dəfələrlə fəxri fərmana, mükafatlara layiq görülüb.
Bir sözlə, sadə, səmimi, zəhmətkeş adamları hamı sevir və onlara hörmət bəsləyir. Həyatda və işlərində Rübabə xanıma uğurlar arzulayırıq.
İlhamə Məhəmmədqızı
Xəbərdən istifadə edərkən istinad etmək vacibdir.
