Bildiyiniz kimi, Sumqayıt Bakı şossesində illərdir davam edən tıxaclar sayəsində paytaxta işləməyə, təhsil almağa gedən sakinlərin müəyyən qismi sürət qatarlarından istifadə edir. Əks istiqamətdə hərəkət edənlərin də sayı ilbəil artır. Bir il öncə bu yola Sovet dövründən qalma, lakin Sloveniyada restavrasiya edilmiş köhnə tipli ekspress qatarlar da əlavə edildi. Sumqayıtdan çıxan sərnişinlər üçün bu, xüsusilə sevindirici oldu. Çünki gündə 2 dəfə Bakıya və Sumqayıta hərəkət edən 11 vaqondan ibarət bu qatarlar sıxlığın qarşısını xeyli dərəcədə alır, digər reyslərdən fərqli olaraq heç bir stansiyada dayanmayaraq, birbaşa mənzilbaşına hərəkət edir. Bunun sayəsində digər reyslər üzrə hərəkət edən yeni marka Stadler qatarlarda da sərnişin seyrəlməsi müşahidə olundu. Bir müddət hər şey qaydasında getdi.
Lakin bir neçə ay öncə qatarların dolumluluq səviyyəsinə görə vaqon sayının tənzimləndiyini, tədris mövsümünün bitdiyini, sıxlığın azaldığını əsas gətirərək, xüsusən yay aylarında region istiqamətləri üzrə artan tələbatı nəzərə alaraq "müvəqqəti addım kimi" vaqonların sayını 11-dən 8-yə endirdilər. Yəni bu vaqonları burdan alıb region qatarlarına qoşdular. Halbuki yenə də ayaqüstə gedən sərnişinlər olurdu.
"Yay və bayram mövzuları" geridə qaldı. Təəssüf ki, yayda atılan analoji addım yenə baş verdi.
Görəsən, ADY tərəfindən sürət qatarlarında gedişhaqqının bahalaşacağı və xidmət keyfiyyətinin artırılacağı açıqlaması verilməsinin sabahı ekspress qatarda vaqonların sayını azaldıb, camaatı ayaqüstə yola salmaq nəyə hesablanıb? Yeni tədris ilinin başlanğıcında böyük sərnişin kütləsi fonunda xəbərdarlıq etmədən vaqon sayının 3 ədəd azaldılmasıdırmı xidmətdə keyfiyyət?! Nəzərə alsaq ki, Stadler tipli qatarlardan fərqli olaraq ekspress qatarlar nisbətən ensizdir və sərnişinlərin oturacaqların arasında sıxlıqda getməsi ümumiyyətlə anlaşılan deyil.
Hər il bir neçə qatar alınacağını müjdələyən ADY nə üçün neçə illərdir davam edən bu sıxlığa çarə tapa bilmir?
Mövzü ilə əlaqədar Azərbaycan Dəmir Yolları ilə əlaqə saxladıq. Qurumun mətbuat katibi Sənubər Nəzərova Xeberle.com-a açıqlamasında hazırda 3 vaqonun təmirdə olduğunu bildirib: "Həmin vaqonlar həftənin sonuna kimi istismara qəbul olunacaq və qatar 11 vaqonla hərəkət edəcək”.
Lakin əldə etdiyimiz məlumata görə bu vaqonların sayını bir az da azaldıb bir hissəsini Xırdalan sakinlərinin ixtiyarına vermək istəyirlər. Bu isə Sumqayıt ekspress qatarında hərəkət edən sərnişin sıxlığını bir az da artıracaq.
Elnur Ağayev
Xeberle.com
Xəbərdən istifadə edərkən istinad etmək vacibdir.
