Marşrutda baş verən macəralardan danışacam. Başlayaq ürəkbulandıran mahnılardan. Sürücülərin zövqünə uyğun səviyyəsiz mahnıların səslənməsi əsəb korlayır. Axı mənim və mənim kimi sərnişinlərin nə günahı var ki, bu cür zövqsüz mahnıları dinləməyə məcbur olaq?!

Sürücülərin öz zövqlərini nəzərə alsaq ilk öncə marşrutdakı sərnişinlərə qarşı hörmətsizlik edirlər. Məsələn, bu gün Bakıda 39 saylı marşrutda səviyyəcə aşağı olan mahnıya qulaq asdım. Niyə mahnılara yox mahnıya dedim,çünki bir mahnını təkrar-təkrar oxudurdular. Hətta yüksək səviyyəli marşrut sürücüsü sükanı buraxıb əlini havaya qaldırır,rəqs edirdi.Özü də züzümə edərək.Bundan ilham alan ştatdan kənar nəzarətçi isə qeyri-qanuni ustadına uyğun olaraq onu yamsılayırdı.İlk növbədə onlar nəzərə almalıdırlar ki,sərnişinlərin həyatı təhlükə qarşısında ola bilər. Dəfələrlə Nəqliyyat Nazirliyinin müfəttişləri onlara qarşı mübarizə apardıqlarını efirdə bəyan ediblər.Buna baxmayaraq yenə onları kor şeytan yoldan çıxarır.Hətta, gündəlik qazancın çoxluğundan riqqətə gəlir,dodağındakı siqareti tüstülədir və salonda olan yaşlı, xəstə və zəif cinsin nümayəndələrini nəzərə almırlar. Dəfələrlə siqaret tüstüsündən əziyyət çəkən,şikayətlənən sərnişinlərə əhəmiyyət verməyən"sürücü əmilər"in bu hərəkətinin şahidi olmuşam. Elələri var ki,"xoşun gəlmir düş taksiynən get"ifadəsini tez-tez işlədir. Belə əmilərə bir sualım var. Nə vaxta kimi insanların əsəbləriylə oynayacaqsınız? Bir də ay "sürücü əmilər",vətəndaşlara müraciət edərkən xala,bibi,dayı sözlərini yığışdırın. Müraciət edərkən sivil qaydada müraciət edin. Dispetçer əmilərə də bir sözüm var. Marşrutda olan sürücülərlə mobil telefonlarla əlaqə yaratmağa son qoyun. Çünki,marşrut sürücüləri bir-birinə qarşı nalayiq sözlər işlədir. Aydındır,marşrutlararası interval gözlənilməlidir. Bunun üçün yarış meydanı lazım deyil.

Sürücülərin ədəbsizliyi olduğu kimi, bəzi sərnişinlər də bundan hali deyil.

Salon içərisində "salonu zibilləməyin"yazıldığı halda salonu küçə bilib,tumun qabıqlarını tökən sərnişinlər müraciətim sizədir. Bura ictimai nəqliyyatdır, Balaxanı zibilliyi deyil. Bir az nəfsinizi saxlasanız tumu marşrutda yox, evdə gözəl şəkildə yeyərsiniz. Bəzən oturduğumuz masalarda analoqu olmayan şüarlara rast gəlirik."Mən səni sevirəm","Gülya, mənə zəng elə","Səni xöşbəxt olmayasan" bu kimi sözlər insanda acı gülüş doğurur. Sərnişinlərin ucadan telefonla danışması ən qıcıq verən hallardan biridir. Öz nəsil-şəcərəvizin həyat və yaradıcılığı haqqında ucadan verdiyiniz məlumat bir sərnişin kimi şəxsən mənə maraqlı deyil. Sərnişinlərin sürücülərə olan müraciət forması da olduqca alçaldıcıdır. Məsələn, "əəə burda saxla","qulağın kardır eşitmirsən?saxla da" ... Hələ bu harasıdır? Sürücülərin keçmişini ortaya qoyan "cəsarətli"sərnişinlər də var.

Əziz sərnişinlər,bir şeyi unutmayın ki, maşın dəmirdəndir, sürücü yox. Onsuz da tıxaclarda əsəbləri pozulmuş sürücüləri haqsız yerə təhqir etmək olmaz. Axı onların da şəxsiyyəti,onların da hüquqları var.Və ən əsası evdə səbrsizliklə gözləyən ailəsi var.

Hə əziz sürücü əmilər, sonra deməyin ki, bu jurnalist xanım bizi qaralayıb.Əsla! Mən sizi yox, haqsızlığı qaralayıram. Mən gördüklərimi yazıram.

Baba Pünhan demişkən:

Qələmimdən saçılan odlu qığılcımlar ilə,

Yandırıb çoxlarını sonra sükut etməliyəm.

Zeynəb Abdullah