"Sağlam Düşüncə” Gənclər Təşkilatı hər il ənənəvi olaraq 31 may Ümumdünya Tütünlə Mübarizə Günü ilə bağlı 1-31 may tarixləri aralığında "Tütünsüz Ay” keçirir.

Təşkilatdan verilən məlumata görə, kampaniya ilə əlaqədar olaraq ikincili siqaret çəkmənin və tütünün zərərləri haqqında təlimlər, seminarlar, bədii film nümayişləri, məlumatlandırıcı görüşlər, velo-yürüşlər, flaş-moblarının təşkili planlaşdırılır.

Layihə çərçivəsində "Sağlam Düşüncə” Gənclər Təşkilatı ilə "Təbiət Dostları” Gənclər İctimai Birliyinin Yaşıl Velosipedçilər Klubu Sumqayıt və Bakı şəhərlərində Velo-yürüşlər təşkil edir. Yürüş iştirakçıları "1-31 may - Tütünsüz ay” şüarı əks olunmuş köynəklərdə aksiyanın ideyasını təbliğ edir. Eyni zamanda veloyürüş iştirakçıları toplanma məntəqələrində tütünün zərərləri haqqında məlumat vərəqələri və bukletlər paylanır.

Qeyd edək ki, "Tütünsüz ay” çərçivəsində may ayının 24-də Sumqayıt şəhərində Sumqayıt şəhəri Gənclər və İdman Baş İdarəsinin dəstəyi ilə ilk velo-yürüş baş tutub. Velo-yürüş Sumqayıtda yerləşən Heydər Əliyev Mərkəzindən başlayıb, son dayanacaq dəniz kənarında yerləşən Nəsimi parkı olub.

Velosipedçilər marşrut üzrə şəhərin mərkəzi kücələrində olublar və yürüş zamanı şəhər əhalisinə tütünün zərərlərindən bəhs edən bukletlər də paylayıblar. Növbəti veloyürüşlər may ayının 31-də isə Bakı şəhərində təşkil ediləcək.  (gun.az)