Sumqayıt Apellyasiya Məhkəməsində Hacıqabul rayon sakini Bayram Həsənov (1978-ci il təv.) barəsində CM-nin 120.2.4 (xüsusi amansızlıqla qəsdən adam öldürmə), 120.2.5 (tamah məqsədi ilə və ya sifarişlə qəsdən adam öldürmə), 120.2.7 (iki və ya daha çox şəxsi qəsdən öldürmə), 29,120.2.4 (xüsusi amansızlıqla qəsdən adam öldürməyə cəhd), 29,120.2.5 (tamah niyyəti ilə və ya sifarişlə qəsdən adam öldürməyə cəhd), 29,120.2.7 (iki və ya daha çox şəxsi qəsdən öldürməyə cəhd) və 228.1 (qanunsuz olaraq odlu silah əldə etmə, saxlama və ya gəzdirmə) maddələri ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb. 

O, ötən il yanvarın 2-də Novxanı qəsəbəsində lüləsi kəsilmiş tüfəngdən qayınatası Nəzər (1966-cı il təv.) və qayınanası Rəfiqə Hüseynovları (1966-cı il təv.) qətlə yetirib, həyat yoldaşı Gülnar Hüseynovanı isə öldürməyə cəhd göstərib. Elə həmin gün hadisə yerindən qaçan şəxs Abşeron RPŞ-nin əməkdaşları tərəfindən Binəqədi rayon ərazisində saxlanılaraq, istintaqa təhvil verilib. 

İstintaq zamanı Bayram Həsənov ifadəsində əvvəllər bir dəfə evli, ilk nikahından üç övladı olduğunu göstərib. 2007-ci ildə Gülnar Hüseynova ilə ailə həyatı qurub, onların bir övladı olub. Hadisədən bir ay əvvəl arvadı uşağı da götürərək atası evinə gedib, bundan sonra münasibətləri daha da gərginləşib. Təqsirləndirilən şəxsin sözlərinə görə, qayınanası və qayınatasını əvvəlcədən öldürmək fikri olmayıb, silahı qorxutmaq məqsədi ilə götürüb. Düşünüb ki, yoldaşı onunla barışacaq və evə qayıdacaq. Lakin evə daxil olub, gəlişinin məqsədini bildirdikdən sonra arvadı və onun valideynləri ilə münaqişə başlayıb.

Qarşılıqlı təhqirlərdən sonra, qayınatası evdən çıxıb getməsini tələb edib, əks halda onu polisə zəng edəcəyi ilə hədələyib. O, getmək məqsədi ilə həyətə çıxıb, lakin arxasınca səslənən söyüşlərə dözməyərək əvvəlcə havaya atəş açıb, sonra Rəfiqəyə, ardınca isə Nəzərə atəşlər açıb.  

Məhkəmə prosesində Bayram Həsənov ittiham üzrə özünü qismən təqsirli hesab edərək, cinayəti qəsdən törətmədiyini bildirib.

Zərərçəkən Gülnar Hüseynova bildirib ki, Bayramla yola getməməsinin səbəbi onun tərəfindən tez-tez döyülərək, təhqir olunması olub, buna görə qadın ayrılmaq istəyib və atası evinə gedib. Hadisə baş verən gün Bayram evlərinə silahla hazırlanmış vəziyyətdə gələrək, onu və valideynlərini təhqir etməyə başlayıb, sonra isə tüfəngdən atəş açmaqla ata-anasını öldürüb. Zərərçəkən mərhum valideynlərinin sakit, mübahisə etməyi xoşlamayan və mehriban insan olduqlarını, təqsirləndirilən şəxslə ədavətləri olmadığını qeyd edib.    

Bakı Ağır Cinayətlər Məhkəməsinin hökmü ilə Bayram Həsənov ittiham üzrə təqsirli bilinərək ömürlük azadlıqdan məhrumetmə cəzasına məhkum edilib. Hökmdən narazı qalan təqsirləndirilən şəxs apellyasiya şikayəti verərək, barəsində olan hökmün dəyişdirilməsini və cəzasının müddətli cəza ilə əvəz edilməsini xahiş edib.  

Sumqayıt Apellyasiya Məhkəməsi cinayət işinin hallarını araşdıraraq birinci instansiya məhkəməsinin hökmünü qüvvəsində saxlayıb.  (oxu.az)