Sumqayıtda hərəkətin intensiv olduğu 43-cü məhəllə, Ş.Bədəlbəyli küçəsində piyadaların rahat hərəkəti üçün keçid və zebraların vəziyyətinin qənaətbəxş olmadığı barədə məlumat vermişdik.
Belə ki, ərazidə yaşayan sakinlərin bildirdiyinə görə, adıçəkilən küçədə əsas yol nişanlarının bəziləri rənglənsə də, nədənsə piyada zolaqları unudulur. Heç şübhəsiz bu da, yol-nəqliyyat hadisələrinin baş verməsini qaçılmaz edir; bu yaxınlarda ərazidə bir piyadanın vurulması ilə nəticələnən ağır yol-nəqliyyat hadisəsi kimi...
Məsələ ilə bağlı Azərbaycan Yerüstü Nəqliyyat Agentliyinin (AYNA) ilə əlaqə saxladıq. Qurumun mətbuat katibi Tural Orucov Xeberle.com-a açıqlamasında Sumqayıt şəhərində nişanlanma xətlərinin yenilənməsinin mərhələli qaydada həyata keçirildiyini, sözügedən ünvanda da müvafiq yol nişanlarının quraşdırılması işlərinin artıq aparıldığını bildirib: "Regionlarda, o cümlədən Sumqayıt şəhəri ərazisində yol nişanlarının quraşdırılması və nişanlanma xətlərinin çəkilməsi səlahiyyəti müvafiq fərmanla AYNA-ya verilib. Sumqayıt şəhərində nişanlanma xətlərinin yenilənməsi də mərhələli qaydada həyata keçirilir. Sözügedən ünvanda da müvafiq işlər görülüb".
Elşən Yəhyayev
Xəbərdən istifadə edərkən istinad etmək vacibdir.
