1950-ci ilin soyuq bir qış günündə, kiçik çillənin bitdiyi gündə 26 fevralda Azərbaycanın dilbər güşəsi olan Zəngilan rayonunda tanınmış nəsillərin ailəsində bir qız uşağı dünyaya göz açdı.

Söhbət ömrünün 75-ci baharını yaşayan dəyərli insan, peşəkar pedaqoq, əsl müəllim, fədakar ana, qayğıkeş bacı, sevimli qayınana və istəkli nənə Qətibə Əsədovadan gedir. 

O, səkkizillik təhsilini Zəngilan şəhər orta məktəbində almış, 1965-ci ildə ailəsi ilə birlikdə Sumqayıt şəhərinə köçdükdən sonra orta təhsilini burada başa vurmuşdur. Ali təhsilini isə Azərbaycan Pedaqoji İnstitutunun Məktəbəqədər təhsilin psixologiyası və pedaqogikası fakültəsində almışdır. 

Ali təhsilli pedaqoq olan Qətibə xanım təhsilin müxtəlif pillələrində çalışıb. O, məktəbəqədər təhsil, daha sonra xüsusi qayğıya ehtiyacı olan uşaqlarla iş və nəhayət ömrünün müdrik çağında əmək veteranları ilə çalışıb. Bütün sahələrdə qeyri-adi idarəçilik fəaliyyətinə malik bir insan olduğunu sübut edərək dərin hörmət qazanmışdır.

Əmək fəaliyyətinə 53 nömrəli uşaq bağçasında metodist kimi başlayıb. Uzun illər Sumqayıt şəhər 48 nömrəli uşaq bağçasının müdiri vəzifəsində işləyib. Həmin illərdə "Qabaqcıl maarif xadimi" adına layiq görülüb. Qətibə xanım Şağandakı sağlamlıq imkanları məhdud olan uşaqlar üçün İnternat evinin direktoru, daha sonra Saray qəsəbəsindəki İnternat evinin direktoru və nəhayət Müharibə və Əmək vəteranlarının Pansionatında direktor vəzifəsində çalışıb. 

İnsanların ən yaxşısı xalqa daha çox faydası olanlardır. Qətibə xanım pedaqoji fəaliyyətlə məşğul olmaqla yanaşı,ondan kömək, dəstək istəyən insanlara da daima zaman ayırmış, istənilən köməyi əsirgəməmişdir.     

Adətən insan müəyyən yaş həddinə çatanda, deyirlər ki, o, ömrünün müdriklik çağını yaşayır. Lakin müdriklik heç də yaşla ölçülmür. Müdriklik insanın ən ali məziyyətlərindən biridir. O, həm də inanılmış, sabit və etibarlı sərvətdir. Fəlsəfi düşüncə tarixində deyildiyi kimi, qüvvət, gözəllik və həqiqətə tapınma insanın bu ali məziyyətə sahib olması haqqı və səlahiyyəti ilə bağlıdır.

Qətibə xanım, məhz belə simalardandır. O, həmişə insanlara örnək olmuş, öz xeyirxah əməlləri ilə onlara həm maddi, həm də mənəvi dəstək göstərmişdir.

75 yaş ömrün müdrik çağıdır. Ömür kitabınızın 75-ci səhifəsi xoş xatirələrlə zəngin olsun. 75 yaşa "ömrün qızıl payızı” da deyirlər. Onun bu qızılı payızdan sonra gələn və ömrünə parlaq qar dənəcikləri kimi min bir naxış vuracaq müdrik, bəmbəyaz qışı da çox aydın görünür. Yol şəffaf olanda bu başından o biri başını görmək çətin olmur...

Mənalı ömrünü xalqına, elinə-obasına, təhsilin inkişafına həsr etmiş Qətibə xanımı yubileyi münasibətilə təbrik edir və deyirik: «Sizi tanıyanlar sizinlə fəxr edir Qətibə xanım! Yubileyiniz mübarək!”