Şəhid ailələrinin və müharibə əlillərinin sosial müdafiəsinin təmin edilməsi, onların problemlərinin həlli dövlət siyasətinin əsas istiqamətlərindən biridir. Prezident İlham Əliyevin və Birinci vitse-prezident Mehriban Əliyevanın tapşırıqlarına uyğun olaraq, Sumqayıt şəhərində də bu kateqoriyadan olan vətəndaşlara xüsusi diqqət və qayğı göstərilir.
Novruz bayramı münasibətilə Sumqayıt şəhərində 1500-dən çox şəhid ailəsi, müharibə əlili və aztəminatlı ailəyə bayram sovqatları təqdim edilib. Bununla yanaşı, Sumqayıt Şəhər İcra Hakimiyyətinin başçısı Zakir Fərəcovun 6 oktyabr 2021-ci il tarixli 569 nömrəli sərəncamı ilə yaradılan Əlaqələndirmə Mərkəzi şəhid ailələri və müharibə əlillərinin problemlərinin həlli istiqamətində mühüm addımlar atır.
Şəhər İcra Hakimiyyətinin əməkdaşları, şəhid ailələrinin üzvləri və müharibə əlillərindən ibarət olan Əlaqələndirmə Mərkəzinin nümayəndələri mütəmadi olaraq bu kateqoriyadan olan insanları ziyarət edir, onların qayğıları ilə maraqlanır və problemlərinin həlli istiqamətində tədbirlər görürlər.
Ölkənin ərazi bütövlüyü uğrunda qəhrəmanlıq göstərən qazilər və şəhid ailələri daim diqqət mərkəzində saxlanılır. Sumqayıtda müharibə iştirakçıları və şəhid ailələri ilə fərdi görüşlər keçirilir, onların sosial problemlərinin həlli üçün müvafiq dəstək göstərilir. Bu istiqamətdə görülən işlər gələcəkdə də davam etdiriləcək.
Xəbərdən istifadə edərkən istinad etmək vacibdir.
