Hamı "sarı zolaqlar”dan, rayon qeydiyyatında olan avtomobillərin paytaxta buraxılmamasından danışır. Çoxu da tənqid edir, hətta bəziləri bu addımı atanları təhqir edərək əsəblərini cilovlamağa çalışır. Amma.... Dostlar, indi tərsini fikirləşək. Tutaq ki, bu zolaqlar yoxdur, bütün avtomobillər rahat şəkildə paytaxta daxil olur və istənilən yolda hərəkət edir.... Belə olan halda, yarışların başladığı günlərdə vəziyyət necə olacaq? Təbii ki, bunu təsəvvür belə etmək istəmirəm. Əslində bütün xəbərdarlıqlara baxmayaraq, şəxsi avtomobili ilə yola çıxan və tixaclarda vaxt itirən sürücüləri mən "tixaca düşənlər” yox, "tıxaca səbəb olanlar” adlandırıram. Avropa oyunları yaxşı bir fürsətdi ki, şəxsi avtomobillərimizdən imtina edib, ümuminəqliyyata üstünlük verək. Bununla biz ...
1) Ümumən sıxlığın yaranmamasına səbəb olarıq,
2) Əsəblərimizi qorumuş olarıq
3) Tıxaclarda artıq yanacaq sərf etmədən, pulumuz cibimizdə qalar
4) Nəhayət biz də öyrənərik ki, avtomobilimizin getdiyimiz ünvanda, mütləq gözümüzün qabağında park edilməsi vacib deyil.
5) Müəyyən qədər piyada yol qət etmək sağlamlığımızı qorumaq üçün də gözəl vasitədir.
Bir sözlə dara düşən kimi, tənqid etməyə adam və ünvanlar tapmaq, ümumi məsələlərdə həmrəylik nümyiş etdirməmək bizim köhnə xasiyyətimizdir. Amma dostlar, nəzərə alın ki, biz Avropadan olan minlərlə qonağı qarşılamağa hazırlaşırıq. Evimizə də qonaq gələndə müəyyən hazırlıqlar görürük, hətta məcazi mənada sarı zolaqlar da çəkirik ki, bəs bura qonaqlar üçündür, ora heç kim daxil olmasın. Tənqid etmək ən asan işdir. Amma çıxış yolu tapmaq, tövsiyələrə əməl etmək, müvəqqəti çətinlikləri şişirtməmək bax bu, ictimai məsuliyyətini dərk edən vətəndaşın işidir. Təbii ki, o da qəbulolunmazdır ki, hansısa "xüsusi” nömrə sahibləri tabesizlik nümayiş etdirərək yollarda "Avtoş oyunları” sərgiləyirlər. Unutmayaq ki, Avropa oyunları zamanı biz həm də özümüzü xalq olaraq təbliğ etmiş olacağıq. Avropalıların gözündə azərbaycanlı obrazının düzgün formalaşması isə hər birimizdən asılıdır. Səbirli, məsuliyyətli və həmrəy olaq...

Elnur Niftəliyev
Xeberle.com