Sumqayıt şəhərində media və ictimaiyyətlə əlaqələr sahəsində kadr təyinatı gerçəkləşib. Tanınmış telejurnalist, media mütəxəssisi Nizami Rəsulov Sumqayıt Bələdiyyəsinin İctimaiyyətlə əlaqələr şöbəsində Mətbuat xidmətinin rəhbəri vəzifəsinə təyin olunub.
Bu barədə məlumatı Sumqayıt Bələdiyyəsi yayıb.
Nizami Rəsulov ölkə mediasında peşəkar fəaliyyəti ilə tanınan simalardan biridir. O, uzun illər "XəzərXəbər”də jurnalist və reportyor kimi çalışır, eyni zamanda Den.az və Denaztv Media GROUP-un təsisçi direktoru olaraq regional media məkanında innovativ və obyektiv jurnalistikanın formalaşmasına mühüm töhfələr verir.
Media və kommunikasiya sahəsində zəngin təcrübəyə malik olan Nizami Rəsulovun Sumqayıt Bələdiyyəsində bu vəzifəyə gətirilməsi şəhər vətəndaşları ilə səmərəli informasiya mübadiləsinin gücləndirilməsi baxımından mühüm addım kimi qiymətləndirilir.
Qeyd edək ki, yeni dövrdə bələdiyyələrin ictimaiyyətlə əlaqələrinin gücləndirilməsi, şəffaf fəaliyyətin təşviqi və medianın aktiv şəkildə cəlb olunması mühüm əhəmiyyət kəsb edir. Bu baxımdan, Nizami Rəsulovun təyinatı həm peşəkarlıq, həm də ictimai etimad baxımından uğurlu seçim hesab olunur.
Xəbərdən istifadə edərkən istinad etmək vacibdir.
