Ölkədə bankların faiz özbaşınalığı bir tərəfə qalsın, indi də daimi müştərilərə-məvacib alanlara qarşı "lotuluq" etməyə başlanılıb. Kapital Bankdan kart vasitəsilə maaş alan müəllimlər əməlli-başlı get-gələ salınır. May ayında kartlarının istifadə müddəti bitən müəllimlər yeni kartları ala bilmirlər. Səbəb isə bankın ötən illərin əksinə olaraq bu il müəllimlərin şəxsən banka gəlməsi və kartları alması göstərişini verməsidir.
Qanuni cəhətdən bir pozuntu yoxdur. Lakin nəzərə alsaq ki, Sumqayıt müəllimləri say etibarı ilə heç də az deyil. İndi Sumqayıtda bütün məktəb və bağçalardakı müəllim və texniki işçilər kartlarını şəxsən gedib bankdan almalıdırlar. Bu isə bankın önündə böyük bir izdiham yaradır. Bu problem ötən həftənin cümə günündən davam edir. Hətta kart növbəsində mübahisələr də yaranıb və bəzi müəllimlər əlbəyaxa olublar. Təsəvvür edin, bankda 2-3 nəfər xidmət edir, onlar da 10-15 dəqiqəyə 1 şəxsi yola sala bilirlər. İndi Sumqayıt müəllimlər ordusunun sayını hesablayın, hər birini vurun 10-15 dəqiqəyə və yayın istisini də nəzərdən qaçırmayın. Səhər saat 6-7-dən növbələr tutulur. Saat 11-də 180-200-cü adam qeydə alınır.
Təsəvvür edin ki, az qala, bütün müəllimlərin bank borcu və digər kreditləri də var. Görəsən, kartlarını haçan alıb borc ödəyəcəklər, bu yazıq müəllimlər?!

Nəzərinizə çatdırırıq ki, ötən illərdə kartlar məktəblərə göndərilir və paylanırdı. Yəni Kapital bank tərəfindən vaxtı bitmiş kartları yenisi ilə əvəz edəndə hər müəssisəninkini toplam konvertlənmiş qaydada məktəbə verilirdi. Cari ildə çox gülməli bəhanə ilə bu yığışdırılıb. Bəhanə isə ondan ibarətdir ki, guya ölmüş adamların və ya yaxud qeyri-qanuni şəxslərin kart almasının qarşısını almağa çalışır Bank. Qeyd edək ki, həmin kartları yeniləmək üçün müəllimlərin şəxsiyyət vəsiqələrinin 4 surətini elə məktəb rəhbərliyi tərəfindən yığılıb banka göndərilmişdi. Necə olur ki, bank bunu qanuni qəbul edir, amma həmin kartları məktəblərə göndərməyə qanunsuzluğa calayır?!

Halbuki, səhiyyə işçiləri öz kartlarını elə işlədikləri müəssisələrində ala biliblər. Yəni onlara iş yerlərində paylanılıb. Müəllimlər isə növbələrə sürüklənir. Bu ayrı-seçkilik hardan qaynaqlanır?

Elvin Babayev
Xeberle.com