Qonaqpərvər, mədəni və məsuliyyətli...
Avropa Oyunları zamanı hər bir vətəndaş üzərinə düşən məsuliyyəti dərk etməlidir. Taksi sürücüsündən başlamış, hansısa vəzifə sahibi olan şəxslərə kimi. Şübhəsiz ki, ölkəmizə gələn hər bir qonağa göstərdiyimiz münasibət xalqımız haqqında ümumi fikrin formalaşmasına səbəb olur. Məsəl üçün, istər restoranlarda, istərsə də satış məntəqələrində qiymətlərin süni şəkildə artırılması turist axınına mane olan səbəblərdəndir. Təcrübə göstərir ki, turistləri xidmət sahələrindəki qiymətlərin münasibliyi daha çox maraqlandırır. Bu halda sahibkar və ya satıcı turist bolluğundan istifadə edib, süni qiymət artımına yol verməməlidir. Gülərüz, xoş münasibət, qüsursuz xidmət də öz yerində... Adi küçə davranışları belə mənfi və ya müsbət rəy yaratmaq üçün yetərlidir. İşıqforun rənglərini tanımaqla iş bitmir, yol hərəkəti qaydalarına əməl etmək lazımdır. Yeraltı və yerüstü keçidlər yalnız gözəllik naminə inşa olunmayıb, əsas məqsəd piyadaların və sürücülərin təhlükəsiliyini təmin etməkdir və s.... Bir sözlə turistlərin gözündə azərbaycanlı obrazının yaranması hər birimizdən asılıdır.

Sivil müsəlman obrazı...
Bu vətənin daşı da bizimdir, torpağı da. Bu vətənin problemi də bizimdir, uğuru da. Onun haqqında ümumi bir fikri də biz formalaşdırırıq. Niyə hansısa Mamedə, Əlibalaya görə adımız fürsətcil, acgöz hətta qəddar olsun ki.... Onsuz da avropalının beynində vəhşi, terrorçu müsəlman obrazı qərb mediasının dünya çapında yeritdiyi total təbliğat nəticəsində çoxdan formalaşdırılıb. İndi də bu ideyanın yaddaşlara həkk olunması üçün bütün vasitələrə əl atırlar. İş o yerə çatıb ki, hətta bəzən müsəlmanlar özləri inanırlar ki, qərbin apardığı bu təbliğat həqiqətə söykənir. Yəni, həqiqətən də bütün terror hadisələrini müsəlmanlar törədir və onlar sivil dünya ilə ayaqlaşa bilmir. Müsəlman ölkələrində münaqişə ocaqlarının sayını artırmaqla Qərb məqsədinə doğru daha bir addım irəlləmiş olur. Dostum, jurnalist Aqşin Kamalın başına gələn bir əhvalatı heç cür unuda bilmirəm. Səhv etmirəmsə bu, Fransa paytaxtında baş vermişdi. Dövlət tədbiri ilə əlaqədar bu ölkəyə ezam olunan həmkarım, operatoru ilə birlikdə paytaxtda çəkiliş apararkən kameranın şarjı bitir və onlar yaxınlıqdakı mağazalardan birinin sahibinə müraciət edirlər ki, mümkündürsə bizə cəmi yarım saatlıq şərait yaradın kameranı enerji ilə təmin edək. Razılıq verilir... Amma onların müsəlman olduğunu biləndən sonra, obyekt sahibi təlaşa düşür və onlara potensial terrorçu kimi baxdığından yardım göstərməkdən imtina edir. Halbuki, həmkarım və operatoru qərbin beyinlərdə formalaşdırdığı Bin Laden tipindən çox uzaq olublar. Həm geyim, həm də görünüşcə. Bu baxımdan Avropa oyunları tək Azərbaycan deyil, bütün müsəlman dünyası adına böyük və yaxşı bir fürsətdir. Avropa ailəsi müsəlmanların sivil dünyanın bir hissəsi olduğunu, istər idman, istər mədəniyyət, istərsə də digər sahələrdə uğurlar əldə etdiyini, əhalisinin böyük əksəriyyəti müsəlman dininə sitayiş edən bir ölkənin qitə və dünya səviyyəli tədbirlərə necə ev sahibliyi etdiyini məhz Azərbaycanın nümunəsində görəcək. Bu işdə hər birimizin üzərinə böyük məsuliyyət düşür. Sən, mən, o.... Həmrəy olmalıyıq, bir məqsəd ətrafında birləşməliyik.... Biz bir olanda güclüyük, bu gücü, qüvvəni Avropa oyunları zamanı daha məsuliyyətli, sivil, qonaqpərvər təqdim etməksə məhz öz əlimizdədir.