Sumqayıt şəhəri, Saray Bağları, Qurd Dərəsi massivi, Ruhulla Axundov küçəsində yaşayan sakinlər artıq 10–15 ildir ki, kanalizasiya sistemi olmadan yaşamağa məcburdur. Ərazi sakinlərinin bildirdiyinə görə, bu müddət ərzində dəfələrlə müvafiq qurumlara şikayətlər və müraciətlər edilsə də, heç bir ciddi addım atılmayıb.
Sakinlərin Xeberle.com-a bildirdiyinə görə, bir neçə dəfə əraziyə kanalizasiya boruları gətirilib, lakin işlər ya ümumiyyətlə başlamayıb, ya da yarımçıq saxlanılıb. Borular bəzən gətirilib, bir müddət sonra yenidən aparılıb və bu proses illərdir təkrar olunur.
Şikayət edən vətəndaşlar bildirirlər ki, hər dəfə müraciət etdikdə İri Şəhərlərin Birləşmiş Su Təchizatı və yerli idarələr tərəfindən yalnız "layihə hazırlanır” kimi şablon cavablarla qarşılaşırlar. Lakin illər keçsə də, ərazidə nə kanalizasiya çəkilir, nə də vəziyyətlə bağlı konkret tədbir görülür.
Hazırda Saray Bağlarında evlərin tullantı suları küçələrə axır, nəticədə pis qoxu və antisanitar vəziyyət yaranıb. Bu həm ətraf mühitə ziyan vurur, həm də sağlamlıq üçün ciddi təhlükə yaradır.
Sakinlər Azərsu ASC, Sumqayıt şəhər Su Kanal və Bağlar Su Kanal idarələrinə müraciət edərək məsələni nəhayət ki, ciddi şəkildə araşdırmalarını, kanalizasiya sisteminin quraşdırılmasını və əraziyə mütəmadi nəzarətin təmin olunmasını tələb edirlər.
Xəbərdən istifadə edərkən istinad etmək vacibdir.
