Küçə ticarəti, öz də azyaşlı, hələ məktəb yaşı çatmayan uşaq tərəfindən... Onun cəmi 6 yaşı var, adı Əlidir. Səhər obaşdan durub evdən çıxır, bir də gecə saatlarında evə qayıdır. Dediyinə görə, anası ilə birgə 16-cı mikrorayonda yaşayır. Limon və popkorn satışı ilə məşğuldur. Əsasən Sumqayıtda daş bazarı ərazisində və Heydər Əliyev parkında müştəri səsləyib pul qazanır...

Onu ilk görəndə heyrətimi gizlədə bilmədim... Sısqa, başı keçəl, dərisi qapqara yanmış bir uşaq 6 yaşının olmasına baxmayaraq müştəri ilə təcrübəli, dilli-dilavərli ticarətçilər kimi ''al-ver'' edirdi.

Arıq qolları, zərif çiyinləri neçə-neçə yükə şahid olmuşdu... Satacağı popkornları özündən iki dəfə böyük olan bir qutuya qoymuş, ip bağlayaraq sürüyə-sürüyə aparırdı... Gözü iti, başı ayıq, qulağı daim səsdə, axtarışda olan bir uşaq idi.

Şirin və ''diri'' danışığı ilə əla müştəri cəlb edə bilirdi...
İlahi, axı bu körpənin təqsiri nədir ki, körpə yaşlarından anası onu çörək pulu qazanmağa göndərir?! Onları tərk edən atasımı? İşləməyə məcbur edən anasımı? Cəmiyyətmi? Yoxsa elə körpənin özümü?!

Körpənin özü - ona görə ki, o, çox bacarıqlı, istedadlı biri kimi doğulub. Onun yerinə başqası olsaydı, anası onu belə işlədə bilməyəcəkdi...

Uşağı çətinliklə danışdıra bildik... Hiss olunurdu ki, artıq bəzi ''boşboğazlar''ın sayəsində xeyli təcrübə də qazanıb. Artıq danışmağı xoşlamır: ''Alırsan, ya yox?!'

Əlqərəz, hara baxır bizim aidiyyəti qurumlarımız ki, 6 yaşlı körpə küçə ticarəti ilə məşğul olur.., yəqin ki, aid olmayan yerlərə...

Bəlkə, bu uşaqdan günün sonunda utanmaz-utanmaz ''dolya'' alanlar da tapılır..

Güc-bəla ilə 2 dəqiqə söhbət etməyimizə şərait yaratdı... Bir az sehrləndik də... Bilmədik bu faciəvi günümüzdənmi, ya uşağın fitri istedadındanmı...

Bir də onda ayıldıq ki, hərəmiz dinməz-söyləməz  60 qəpiyə aldığımız popkornu ləzzətlə yeyirik... Halbuki, kiçik miqdarda qablaşdırılan bu məhsul kənar yerlərdə uzağı 20 qəpiyə satılır...
Əli isə artıq ərazidən xeyli uzaqlaşmışdı... Qaranlıqda onun yalnız sürüyə-sürüyə apardığı iri qutusunun xışıltısı gəlirdi...

Elnur Ağayev/Xeberle.com
P.S. Bu körpə alverçi insan alveri ilə məşğul olanlar üçün ən asan bir ''ov'' qismindədir.