Sumqayıt şəhərinin "Qurd dərəsi” adlanan ərazisində yaşayan 10 mindən çox sakinin illərdir davam edən yol və nəqliyyat problemi üz-üzə qalıb.
Sakinlərin Xeberle.com-a göndərdiyi görüntülər ərazidə rəsmi qurumlar tərəfindən yol çəkilməməsi, nəqliyyat infrastrukturunun qurulmaması və dayanacaqların olmaması kimi ciddi çatışmazlıqları bir daha ortaya qoyur.
Məlumata əsasən, nə yolun, nə də avtobus dayanacaqlarının olmadığı bu yaşayış massivində avtobuslar çətinliklə hərəkət edir. Rəsmi dayanacaq olmadığından sakinlər yağışdan, küləkdən və günəşdən qorunmaq üçün öz vəsaitləri hesabına improvizasiya edilmiş "dayanacaqlar” qurublar. Onların hətta sakinlər tərəfindən verilmiş qeyri-rəsmi adları da var: "1-ci dayanacaq”, "2-ci”, "2-3 arası”, "5-ci”, "6-cı” və s.
Bu əl işi dayanacaqlar nə müasir, nə də standartlara uyğun olsa da, sakinlərin çıxılmaz vəziyyətdə göstərdiyi təşəbbüsün, yaradıcı yanaşmanın göstəricisi kimi qiymətləndirilir.
Sakinlər ümid edirlər ki, problemlərin ictimailəşdirilməsi ilə "Qurd dərəsi”nə nəhayət diqqət ayrılacaq və yol-nəqliyyat infrastrukturunun qurulması istiqamətində addımlar atılacaq.
Xəbərdən istifadə edərkən istinad etmək vacibdir.
