1-ci Avropa Oyunları məşəlini açılış mərasiminə Qarabağ müharibəsində iki gözünü itirmiş qəhrəmanımız, dəfələrlə Olimpiya çempionu olmuş İlham Zəkiyev gətirdi və Olimpiya alovunu o alovlandırdı.
Gözlərinin görməməsinə baxmayaraq ayaq üstə durmağı bacaran döyüşçü-idmançımızın məşəli qaldırmasında böyük bir simvolik məna da var idi.
Ancaq təəssüf ki, cəmiyyətimizdə onu tanımayanlar da var.
İlham kəşfiyyatçı olub. Bir çox təhlükəli döyüş tapşırıqlarının öhdəsindən bacarıqla gələn əsgər Zəkiyev yeddi ay orduda nümunəvi xidmət edir, fəxri fərmanlar alır. 1999-cu ilin fevral ayında növbəti dəfə döyüş tapşırığını yerinə yetirərkən erməni snayperinin açdığı atəş nəticəsində İlham yaralanır. Güllə onun başına dəyir, sol gicgahından girərək sağ gicgahından çıxır. İlham aldığı yaradan komaya düşür.
Komadan çıxdıqdan sonra məlum olur ki, İlham görmə qabiliyyətini tamamilə itirib. Həkimlər hətta belə bir ölümcül yaradan sonra onun sağ qalmasını möcüzə sayırdılar. Bütün göstərilən səylərə baxmayaraq, İlhamın görmə qabiliyyətini qaytarmaq mümkün olmur. İlham Zəkiyev birinci dərəcəli Qarabağ əlili kimi evə dönür. Bu zaman onun hələ 19 yaşı tamam olmamışdı.
Hərbi xidmətdən evə dönən İlham idman karyerasına başlayır. 2 dəfə paralimpiya oyunları çempionu, 2 dəfə dünya çempionu, 5 dəfə Avropa çempionu olur. Əməkdar idman ustası adını, "Şöhrət" ordeni və "Tərəqqi" medalını alır. (atv.az)
Xəbərdən istifadə edərkən istinad etmək vacibdir.
