Günümüzdə ölkəmizdə geniş miqyaslı quruculuq işləri aparılır, infrastruktur layihələri həyata keçirilir. Prezident İlham Əliyevin siyasi kursuna uyun olaraq, bütün bu quruculuq marofonunun mərkəzində insan faktoru durur və son nöqtə olaraq paytaxt və regionlarda yeni infrastruktur qurğularının, təhsil ocaqlarının, sağlamlıq və bərpa ocaqlarının, idman və əyləncə mərkəzlərinin, park və yaşıllıq zolaqlarının, həmçinin digər strateji və ictimai inşaat obyektlərinin tikilməsi ilə cəmiyyətin sağlam ruhda perspektiv inkişaf xətti hədəflənir. Bütün bunlar vətəndaşlarımızın rahatlığı, onların fiziki, mənəvi, intellektual inkişafı, əlverişli hərəkəti, həmçinin asudə vaxtlarının səmərəli keçirmələri üçün hesablanır. Bəs bundan bütün vətəndaşlarımız yararlana, zövq ala bilirmi? Görəsən, bu cəmiyyətin ayrılmaz hissəsi olan əlil və fiziki imkanları məhdud həmvətənlərimiz də bizim qədər sevinirmi, asudə vaxtlarını yeni salınmış parklarda, xiyabanlarda səmərəli keçirir və ya yeni nailiyyətlərdən uğurla bəhrələnə bilirlərmi?

 

Sumqayıt şəhərinin küçə, park və xiyabanlarında müəssərlik problemindən söz açacağıq. Təəssüf hissiylə deməliyik ki, bizim bugünkü rahat həyatımız naminə, Vətən uğrunda sağlamlıqlarını fəda etmiş və ya hansısa digər səbəblərdən sağlamlıqlarını itirərək əlil arabalarına məhkum əlil vətəndaşlarımızı biz, cəmiyyət olaraq, haqsız olaraq, unutmuşuq. Bu rahat, firavan günümüzün səbəbkarı olan əlil arabalarına məhkum əlillərimizin, qazilərimizin sevinc haqqını, yaşamaq haqqını, park, xiyaban və küçələrdə sərbəst hərəkət edib müvafiq imkanlardan bizlərlə bərabər yararlanmaq haqlarını əllərindən almışıq.

Sumqayıt şəhərində demək olar ki, bütün ictimai yerlərdə, inzibati binalarda, istirahət yerlərində, küçə, park və xiyabanlarda əlil arabasında olan insanlarımızın sərbəst hərəkətini təmin etməli olan pandus, elevator, asonsor liftlər və hətta adi təbii ehtiyaclarını qarşılamaları üçün zəruri uyğunlaşdırılmış tualetlər belə yoxdur.

 

Sumqayıtda avtomobillərin hərəkət etdiyi yolla gedib gəlmək istənilən əlilə ciddi çətinlik törədir. Bu həm də onlar üçün çox təhlükəlidir Təəssüf ki, Sumqayıtda aparılan yenidənqurma, abadlaşdırma işləri zamanı hərəkət etməsi əngəlli insanların, uşaq arabalarının rahat hərəkəti əksər yerlərdə nəzərə alınmayıb. Yollar salınarkən, yaxud təmir-bərpa işləri aparılarkən əlillər, gözdən əlillər, karlar, yeriyə bilməyənlər nəzərə alınmır. Düzdür, şəhərin müəyyən yerlərində - səkilərdə, pilləkənlərin kənarında panduslar var. Amma bu, çox azdır, hətta barmaqla sayılacaq qədərdir. Üstəlik, əlil arabasında olan vətəndaşın pandusa yaxınlaşanadək səkiyə necə qalxacağı sual doğurur. Bəzi pandusların maillilik dəcəsi nəzərə alınmadığından, onlar demək olar ki, yararsızdır.

Sumqayıtda inzibati tikililəri götürsək, (xəstəxanaları çıxmaq şərti ilə) pandus yalnız ASAN xidmətin, Sumqayıt şəhər Paralimpiya Kompleksinin, Əmək və Əhalinin Sosial Müdafiəsi Nazirliyinin Sumqayıt şəhər şöbəsinin və "Əlil Sahibkarlar Təşkilatı” İctimai Birliyinin binasında quraşdırılıb.

Tikinti üzrə son təlimata əsasən, yeni binaların layihələndirilməsi zamanı əlil arabalarının hərəkəti məsələsinə xüsusi diqqət yetirib, yəni liftlərin, dəhlizlərin, tualetlərin ölçüləri əlil arabalarının hərəkəti üçün yararlı olmalıdır. Amma reallıqda bu təlimatlara riayət olunmur. Araşdırmalar göstərir ki, Sumqayıtda yeni tikilən binaların əksəriyyətində əlillərin hərəkəti üçün şərait yaradılmayıb. Problemlərdən biri də özəl obyektlərin tikilməsi zamanı əlillərin nəzərə alınmamasıdır.

 

Problem təkcə əlilliyi olan şəxslər üçün deyil, körpəsi olan hər bir gənc ailə üçün bir əngəldir. Sumqayıtın küçə və prospektləri ilə uşaq arabasını keçirməkdən ötrü gərək əziyyət çəkəsən. Şəhərin mərkəzi küçələri sayılan Sülh, Səməd Vurğun, Azərbaycan və Heydər Əliyev prsopektində uşaq və əlil arabasında hərəkət edənlər nəzərə alınmayıb. Sanki onlar vətəndaşımız deyil, sanki onlar unudulub və bizimlə eyni hüquqlara malik deyillər.

Prezident İlham Əliyev demişkən, "Hər bir vətəndaşın hüququnun qorunması bizim üçün çox önəmlidir. Vətəndaşlarımızın təhlükəsizliyi də dövlət tərəfindən təmin edilir və bundan sonra da ediləcəkdir". Gəlin əlillərin də hüquqlarını tanıyaraq onların mənzilləri xaricində rahat, təhlükəsiz hərəkəti üçün şərait yaradaq.

Ümid edək ki, Sumqayıt rəhbərliyi şəhərdəki bu problemə operativ reaksiya verəcək və problem tədricən aradan qaldırılacaq.

 

Xəbərdən istifadə edərkən istinad etmək vacibdir.