15 yaşından mətbuatda çalışıram. Kütləvi informasiya vasitələrinin inkişafı gözlərim qarşısında baş verib. İndiki gənc müxbirlər yəqin ki, "kassa naboru”nun nə olduğunu bilmirlər. Bu, cox ağır əl əməyi idi. Qəzetin səhifələri kassada yerləşən şriftləri əl ilə bir-bir yığmağa məcbur idilər. Bəzən səhvlərə yol verilirdi. Proses təkrar olunurdu. Şəkilləri qəzet səhifəsinə çıxartmaq üçün Bakıya göndərilməli, "sinqoqrafiya” sexində onu dəmir lövhələrə köçürməli idilər. Bu da çox vaxt aparırdı. Qəzetə sübh tezdən qol çəkilərdi.

İndi isə hər şey kompüterlə həll olunur. Son 25 ildə istər mətbuat, istərsə də elektron kütləvi informasiya vasitələri çox inkişaf edib. Bu, sevindirici faktordur. Demokratiya, aşkarlıq, söz azadlığı bizə imkan verir ki, öz ideyalarımızı sərbəst şəkildə ifadə edək, yeni-yeni təşəbbüslərlə çıxış edək, düşmənlərimizə qarşı əlimizdə olan ideoloji silahdan maksimum istifadə edək.

1990-cı ilin may ayının 5-də mətbuat günü qeyd olunurdu (Sovetlərin vaxtında mayın 5- jurnalistlərin bayramı idi) "Kommunist Sumqaita” qəzeti bir neçə jurnalistdən müsahibə almışdı, o cümlədən məndən. Müxbirin sualına belə cavab vermişdim: "Senzura ləğv olunmalı, mətbuat müstəqil olmalıdır. Yaxşı olar ki, qəzetlər gündəlik nəşr olunsun və onun xaricdə müxbir postları yaradılsın”.

Mənim kimi düşünənlər Azərbaycanda minlərlə idi. 25 il bundan əvvəl verilən proqnozlar artıq gerçəkləşib. Bu, indi heç kimi təəccübləndirmir. İndiki media nümayəndələri daim axtarışdadırlar. Bu, məni sevindirir.

Sumqayıtda yaradılan "Xəbərlə” portalının fəaliyyəti məni cox qane edir. Qane edən nədir? Birincisi, kollektivin öz siyasəti, öz dəst-xətti var. Operativlik oxucunu razı salır. Xəbərlər cox yığcam və lakonikdir. Müsahibələr öz orijinallığı ilə seçilir. Materialların sosial şəbəkələrdə çox sayda bəyənilməsi, paylaşılması da onun auditoriyasının böyüklüyündən xəbər verir. Bunu ancaq alqışlamaq olar.

Tarixə baxış isə burada çalışan jurnalistlərin böyuk uğurudur. Bu, onların vətənpərvərliyindən, Vətənə, millətə, xalqa, doğulub boya-başa çatdıqları Sumqayıta olan sonsuz məhəbbətin nəticəsidir. "Sumqayıt Sumqayıtı sevənlərindir” şuarı isə hamının ürəyindən xəbər verir.

Son vaxtlar "Sumqayıt TV” ekektron versiyasi media aləmində az bir zamanda böyuk hörmət qazanıb və uğurlar əldə edib. Burada calışan gənclərlə dəfələrlə söhbətim olub. Sağlam duşuncəli, sağlam fikirli jurnalistlərdir. Hər gün bir ideya, hər gün bir fikirlə yaşayan bu media mənsubları daima axtarışdadırlar. Onlar üçün məkan anlayışı yoxdur. Onlar üşün Azərbaycan var. Bu yolda atdıqları addımları ancaq alqışlamaq olar.

Bu gun "Xeberle.com”un 3 yaşı tamam olur. Yaradıcılıq yaşla ölçülmür. Ona əməlinə və əməyinə görə qiymət verilir. Qiymət isə müsbətdir.

Bütün bunlarla yanaşı, gənc qələm dostlarıma bir arzum var: Bazar iqtisadiyyatına keçiddən sonra bir sıra milli-mənəvi dəyərlərimizi itirməyə başlamışıq. Vətənpərvərlik və maarifçilik unudulur. Milli əxlaqımıza uyğun olmayan, ləyaqətimizə, mədəniyyətimizə zidd olan Qərbin bəzi əxlaq tərzini gənclərimizin beyninə yeritmək, bununla da onları böyuk ideallardan uzaqlaşdırmaq nə deməkdir? Bəlkə bu, bir siyasətdir. Bu haqda ciddi duşunməyinizi və mübarizə aparmağınız istərdim.

Eyruz Məmmədov,

Respublikanın əməkdar jurnalisti