3 dost, 3 işlək beyin, 3 enerjili gənc. Düz 3 il bundan əvvəl onlar Xeberle.com portalını yaratdılar. Özlərinin dediyi kimi, 3 amal: Sumqayıtın mədəni, ictimai, siyasi həyatını olduğu kimi işıqlandırmaq üçün.

Bu kollektivi təxminən il yarım bundan əvvəl tanıdım. Qürbətdə idim. Doğma şəhərim üçün çox darıxırdım. İnternet üzərindən Sumqayıtıma "baş vurdum". Məni maraqlandıran sualların, yeniliklərin, xəbərlərin əksəriyyətində "Xəbərlə" portalının imzasını gördüm.

Diqqətimi çəkdi. Bu saytı incələməyə başladım. Mediadan az-çox anlayışı olanlar təsdiq edərlər ki, bir portalın nəbzini tutmaq üçün bir-iki manşet və ya xəbərini oxumaq kifayət edər. Bu saytın nəbzini yoxlayandan sonra məlumum oldu ki, Xeberle.com "öz mühərriki" ilə işləyir.

Bundan sonra davamlı olaraq Sumqayıtı hər zaman Xeberle.com-dan sormağa davam etdim. Təsisçilərlə əyani olaraq tanış oldum. Ramil Zeynallı, Elnur Ağayev və Kamal Almuradlı kimi savadlı və ləyaqətli gənclərin ərsəyə gətirdiyi bu layihənin sağlam rəqabətin hələ ki, oturuşmadığı bir ortamda ayaqda qala biləcəyinə ümidlərim bir daha artdı. Əgər mənə sual olunsa ki, Xeberle.com-un uğurunun səbəbi nədir? Düşünmədən bu cavabı verərdim: İctimaiyyətə açıq olan fəaliyyəti. Məncə, Xeberle.com-un uğurunun ən başlıca səbəbi budur.

Bu və bunun kimi digər uğurlu cəhətlərinə görə mübaliğəsiz qeyd etmək olar ki, bu gün Sumqayıtın "xəbər gəmisi"nin sükanı məhz Xeberle.com portalının əlindədir.

Başqa sözlə desək, sözügedən portal şəhərin media "ağsaqqalı"dır.

Nəzərə alsaq ki, bu xəbər saytının xəbər məkanı artıq Sumqayıtın sərhədlərini aşaraq ölkə gündəminə də nüfuz edir, deməli gəldiyim qənaət doğrudur.

Bunun üzərinə Xeberle.com ailəsinin üzvü, yenicə fəaliyyətə başlayan Sumqayıt TV-nin (sumqayit.tv) şəffaf və tərəfsiz, internet üzərindən yayımına baxmayaraq kifayət qədər baxış və tamaşaçı rəğbəti qazanmasını əlavə etsək, "Siz Ağsaqqalsınız" ifadəsini bu dostlarımıza deməyə nə qədər desək haqqımız var.

3 yaşın mübarək "Ağsaqqal"!

Pərviz Şahhüseynli,
teleaparıcı