"Dərslərimdə elə bir çətinliyim yoxdur. Sadəcə səhər yuxudan oyananda çətinlik çəkirəm. Ali məktəbə yeni daxil olduğum vaxtlar təhsil sisteminin necə maraqlı olduğunun şahidi oldum. Həm dərslərimə, həm dostlarıma marağım böyük idi”.

APA TV-nin xəbərinə görə, bu sözləri Azərbaycan prezidenti İlham Əliyevin oğlu, Azərbaycan Diplomatik Akademiyasının birinci kurs tələbəsi Heydər Əliyev deyib.

O qeyd edib ki, hazırda ingilis dilini mükəmməl səviyyədə bilir. Bir sıra xarici ölkələrdə səfərdə olduğunu deyən ADA-nın birinci kurs tələbəsi əlavə edib ki, bu ölkələrin təhsil sistemlərində fərq olsa da, Diplomatik Akademiyanın səviyyəsi heç də inkişaf etmiş ölkələrdəki təhsil ocaqlarından geri qalmır: "Orta məktəbdə həm təhsil, həm geyim çox fərqli idi. Ali məktəbə daxil olduqdan sonra heç bir fərq hiss etmədim. Elə bilirəm ki, xaricdə oxuyuram. Praktiki olaraq fərq yoxdur”.

Boş vaxtlarını necə keçirdiyi barədə sualı cavablandıran Heydər  Əliyev deyib ki, dərslər bitdikdən sonra belə o, Akademiyada qalır: "Dərslərdən sonra burada qalıram. Dostlarımla gəzirəm, nahar edirəm. Sonra evə gedib dincəldikdən sonra sabahkı dərslərimi hazırlayıram".

Qiymətlərinin yaxşı olduğunu deyən Heydər Əliyev bildirib ki, bundan sonra daha yüksək qiymətlər alacaq. O, dərslərinə valideynlərinin yetərincə diqqət göstərdiyindən də danışıb: "Atam dərslərin vəziyyətini məndən hər gecə soruşur. Dərsə necə getmişəm, qiymətlərim necədir, günüm necə keçib, dərslərim ağır olubmu, dostlarımla nə etmişəm və sair. Mənə də çox xoş olur, çünki o məni fikirləşir".