Sumqayıtda dəfələrlə ağacların kəsilməsi hallarına rast gəlinib. Şəhər rəhbərliyi, eləcə də Ekologiya və Təbii Sərvətlər Nazirliyinin xəbərdarlığına baxmayaraq bu halların qarşısını almaq mümkün olmayıb. Şəhər rəhbərliyinin xəbərdarlığı bəzi şəxslərin vecinə deyil.
Sumqayıtda daha bir "ağac soyqırımı"nın baş verməsi ehtimalı ilə Xeberle.com-a şikayət daxil olub. Bu barədə Sumqayıt şəhər 1-ci mikrorayon, ev 7/5-in sakinləri məlumat verib. Sakinlərin sözlərinə görə, binanın arxasında olan ərazi hasara alınıb və güman ki, tikinti işlərinin həyata keçirilməsi planlaşdırılır.
Bina sakinləri "Xeberle.com"-a ərazidən çəkilən fotolar və video da göndəriblər.
Sumqayıt şəhər İcra Hakimiyyətindən aldığımız məlumata görə, ərazini "Azercell" hasarlayıb, qurum burada öz profillərinə uyğun bəzi rekonstruksiya işləri aparacaq və bu zaman ağaclara toxunulmayacaq.
Ümidvarıq ki, bu ağaclar məhv edilməyəcək. Məsələni diqqətdə saxlayacağıq.

Xeberle.com