Mənim adımdan "Facebookda saxta profil açıb, qeyri-etik sözlər yazırlar”.
Son vaxtlar sosial şəbəkələrdə tanınmış insanların adından saxta profillər açılır. Bu azmış kimi məşhurların adından onlara xas olmayan sözlər, fikirlər və qeyri-etik ifadələr paylaşılır.
Bu cür xoşagəlməz hadisə ölkənin ən nüfüzlu aparıcılarından sayılan Orxan Fikrətoğlunun başına gəlib.
Məsələ ilə bağlı ORCTV.az-a münasibət bildirən teleaparıcı bildirib ki, bununla əlaqədar artıq hüquq mühafizə orqanlarına müraciət edib:
"Əvvəla, onu deyim ki, mənim nə "facebook”, nə də ki, digər sosial şəbəkələrdə səhifəm yoxdur. Heç feysbukun necə açılıb bağlandığını bilmirəm. Ümumiyyətlə, kompyuterdən ancaq yazı yazmaq üçün və hansısa material haqda məlumat toplamaq üçün istifadə edirəm. Maraqlısı odur ki, bu saxta profillərin biri ilə əlaqə saxlanılıb və bildirilib ki, niyə O. Fikrətoğlunun adından istifadə edirsiniz? Cavab isə çox gülməli olub. "Orxan Fikrətoğluna nə var e, özüm bilərəm, nə istəyərəm, onu da edərəm”.
Orxan müəllim söhbət zamanı bildirdi ki, adına açılmış digər bir saxta profil vasitəsi ilə kimlərinsə yazılarına söyüşlər yazılır və qeyri-etik paylaşımlar edilir:
"Mən teleaparıcıdan əlavə, müəlliməm. Nə qədər tələbəm var. Bilməyənlər girərlər və elə başa düşərlər ki, bu cür söyüş və əxlaqsız paylaşımları mən edirəm. Ayıbdır. Mən həm də Mədəniyyət və Turizim Nazirliyinin işçisiyəm. "Salnamə” studiyasının baş redaktoruyam. Əgər bu profillər bağlanmasa, nazirliyin adından da polisə müraciət edəcəyəm.Nə qədər gec deyil, əı çəkin bu işdən".
Qeyd edək ki, bu cür saxta profillər Mehriban Əliyeva, Ramil Usubov, Ramiz Mehdiyev və digər tanınmış şəxslərin adına açılıb. Lakin həmin şəxslər hüquq mühafizə orqanları tərəfindən tapılaraq, məsuliyyətə cəlb olunublar.
Xəbərdən istifadə edərkən istinad etmək vacibdir.
