Avqustun 28-də "Azərikimya” İstehsalar Birliyinin akt zalında Azərbaycan Kimya sənayesinin 70 illik yubileyinə həsr olunmuş müəssisələrarası şahmat turnirinə yekun vurulmuşdur.

Sum­qa­yıtda fəaliyyət göstərən idarə və müəssisələrin kollektivləri arasında qarşılıqlı əlaqələrin genişləndiril­mə­sinə, xoş və səmimi münasibətlərin yaradılmasına xidmət edən şahmat turni­rində «Azərikimya» İB-nin idarə aparatının, Etilen-polietilen zavodunun, Təmir-tikinti İdarəsinin, Sumqayıt Texnologiyalar Parkının, FHN Regional İdarəsinin, Sumqayıt Dövlət Universitetinin, şəhər Təhsil və Səhiyyə şöbələrinin, Sumqayıt Regional Elektrik Şəbəkəsinin, şəhər Rabitə Qovşağının, Qaz-istismar İdarəsinin, YAP Sumqayıt şəhər təşkilatının, AZAL şirkətinin, "ŞAMTİ” və "Qartal” firmasının komandaları da daxil olmaqla 16 komanda iştirak etmişdir.

FİDE-nin qaydalarına uyğun, İsveçrə sistemi ilə, təcrübəli şahmat hakimlərin nəzarəti altında iki gün davam yarışlarda fəallıq və əzmkarlıq nümayiş etdirən şəhər Rabitə Qovşağının komandasının üzvü İlqar Şiriyev turnirin qalibi olmuşdur. "ŞAMTİ” firmasının komandasının üzvü Orxan Babayev və "Təqaüdçülər” komandasının nümayəndəsi Sədulla Səfərov müvafiq olara ikinci və üçüncü yerlərə layiq görülmüşlər.

Turnirin qaliblərinə "Azərikimya” İB-nin Həmkarlar İttifaqı Komitəsi tərəfindən xüsusi diplomlar və pul mükafatları təqdim olunmuşdur.