Abşeron Rayon İcra Hakimiyyətinin
başçısı Zakir Fərəcov Sumqayıt Şəhər İcra Hakimiyyətinin başçısı təyin
edilib. Bu xəbər dünəndən yayılsa da rəsmi təsdiqini tapmırdı.
Musavat.com Abşeron Rayon
İcra Hakimiyyətinə bununla bağlı göndərdiyi sorğuya bu gün cavab alıb.
Cavabda Z.Fərəcovun Sumqayıta icra başçısı təyinatı xəbəri təsdiqlənir.
Amma hələlik bununla bağlı ölkə prezidentinin məlum sərəncamı yoxdu.
Musavat.com-a daxil olan məlumata görə, sərəncamın yaxın saatlarda
veriləcəyi gözlənilir.
Sumqayıtın icra başçısı Eldar Əzizovla bağlı məsələ hələlik açıq
qalır. Bəzi mənbələr onun Bakının Nizami rayonuna icra başçısı
göndəriləcəyini deyir. Nizaminin icra başçısı Tahir Budaqov avqustun
13-də prezidentin sərəncamı ilə Satatistika Komitəsinə sədr təyin
edilib.
Fərəcov Zakir Fərəc oğlu 1954-cü ildə fevral ayının 3-də Laçın
rayonunun Qazıdərə kəndində anadan olub.1961-1971-ci illərdə orta
ümumtəhsil məktəbində təhsil alıb.
Əmək fəaliyyətinə 1971-ci ildə Sumqayıt Superfosfat zavodunda fəhlə kimi başlayıb.
1972-ci ilin noyabr ayından 1974-cü ilin noyabr ayınadək Murmansk
vilayətinin Severomorsk şəhərində keçmiş Sovet Ordusunda həqiqi hərbi
xitmətdə olub.
1971-ci ilin yanvar ayında Sumqayıt şəhəri Mənzil Kommunal Təsərrufatı İstehsalat birliyində texnik kimi işə başlayıb.
1975-ci ildə D.Bünyadzadə adına Xalq Təsərrufatı İnstitutunun
"Sənaye İqtisadiyyatı" fakültəsisinin axşam şöbəsinə daxil olub, 1980-cı
ildə həmin İnstitutu bitirib.
1978-ci ildə Sumqayıt şəhəri Mənzil Kommunal Təsərrufatı Birliyində
şöbə rəisi, 1981-ci ildə baş direktorun müavini, 1988-ci ildə Mənzil
Kommunal İB-nə baş direktor təyin olunub. 1999-cu ildə keçirilən
bələdiyyə seçkilərində Sumqayıt şəhər bələdiyyəsinin sədri seçilib.
2005-ci ilin avqust ayının 11-də Azərbaycan Respublikası
Prezidentin 956 saylı Sərəncamı ilə Abşeron rayon İcra Hakimiyyətinin
başçısı təyin olunub.
01.09.2015 ci Sumqayıt şəhər icra başçısı vəzifəsinə təyin edilib.
Ailəlidir, 4 qızı, 1 oğlu, 5 nəvəsi var.
Xəbərdən istifadə edərkən istinad etmək vacibdir.
