Sumqayıtda yerləşən Qubadlı rayon Təhsil şöbəsində tanınmış jurnalist Ötərxan Eltacın əfsanəvi döyüşçü,leytenant Əlövsət Vəliyevin döyüş yoluna həsr olunan "Əfsanəvi 915” sənədli povestinin təqdimat mərasimi keçirilib.

Tədbirdə Qubadlı rayon İcra hakimiyyətinin məsul işçiləri, idarə, müəssisə və təşkilat rəhbərləri, elm xadimləri, ictimaiyyət nümayəndələri iştirak ediblər.

Təqdimat mərasimində öncə Əlövsət Vəliyevin həyatından, döyüş yolundan bəhs edən videoçarx nümayiş olunub.

Sonra YAP Qubadlı rayon təşkilatının sədri Allahverdi Haqverdiyev çıxış edərək bildirib ki, Qubadlı rayonu torpaqlarımızın bütövlüyü uğrunda gedən mübarizədə 238 şəhid verib, 200 nəfər yaxın insan yaralanıb, 300-dən artıq rayon sakini əlil olub və 100 nəfərdən çox itkin düşüb. A. Haqverdiyev qeyd edib ki, Qubadlı rayonundan 9 nəfər Milli Qəhrəman adına layiq görülüb.

O, "Əfsanəvi 915” kitabından bəhs edərək vurğulayıb ki, 25 il ömür sürən Əlövsət Vəliyev, bu 25 illik ömüründə tarixə bir qəhrəmanlıq səlnaməsi yazdı.

Digər çıxış edənlər də Ə. Vəliyevin qəhrəmanlığından danışıblar.

Sonda «Əfsanəvi 195» sənədli povestinin müəllifi Ötərxan Eltac çıxış edərək kitab üzərində çox axtarışlar apardığını, çoxsaylı adamlarla görüşdüyünü və onların Əlövsət haqqında xatirələrini dinlədiyini qeyd edib.

Müəllif kitabın ərsəyə gəlməsində əməyi olanlara minntədarlığını bildirib.